Әзербайжан президенті Ильхам Алиев Ақтау маңында болған ұшақ апатынан кейін қазақстандық құтқарушылардың батылдығын жоғары бағалады, деп хабарлайды aqshamnews.kz
«Оқиға орын алған сәттен бастап қазақстандық құтқарушылар дереу апат орнына келіп, адамдарды құлаған ұшақтан құтқаруға кірісті. Олар өз өмірлерін қатерге тікті, өйткені жарылыс болуы мүмкін еді. Ұшақтың бір бөлігі жанып жатқанда, екінші бөлігінің өртенуі қаупі болды. Бірақ соған қарамастан, олар нағыз ерлік көрсетті», – деді Әзербайжан президенті.
Сонымен қатар, ол қазақстандық медицина қызметкерлерінің кәсібилігіне ерекше тоқталды.
«Жараланған жолаушылар дереу медициналық мекемелерге жеткізілді. Бұл үшін де Президент Тоқаевқа ризашылығымды білдірдім», – деді Ильхам Алиев.
Президент Әзербайжан халқының қазақстандық бауырлардың қолдауын ерекше бағалағанын атап өтті.
«Қазақстандық бауырларымыздың ынтымақтастығы Әзербайжан халқының жүрегінде терең із қалдырды. Қарапайым азаматтар Ақтаудағы консулдығымызға келіп, гүл шоқтарын қойып, қолдау білдірді. Бұл шынайы достық пен бауырластықтың көрінісі», – деп ерекше тоқталды.
Алиев ұшақ апаты салдарынан қаза тапқан алты қазақстандықтың отбасына көңіл айтты. Өз кезегінде, ҚР Президенті Қасым-Жомарт Тоқаев Әзербайжан басшысына көңіл білдірді.
«Бұл қайғылы оқиға үлкен сынақ болды. Бірақ мен бұл сынақтан кейін біздің достығымыз бен бауырластығымыз бұрынғыдан да нығая түскеніне сенімдімін», – деді Әзербайжан Президенті.