2025 жылғы 20 мамырда Бейжің қаласында Қазақстан делегациясының Қытайға ресми жұмыс сапары өтті. Сапар аясында Алматы облысының әкімдігі, «Азаматтық авиация академиясы» АҚ және Қытайдың Banruo Silu Aviation Co., Ltd. және Hainan Kunying Aviation Co., Ltd. компаниялары арасында стратегиялық ынтымақтастық туралы меморандумға қол қойылды.
Бұл құжат ұзақ мерзімді әріптестік орнатуға және өңірлік халықаралық авиациялық хаб құру мен дамыту бойынша ауқымды жобаны іске асыру үшін қажетті іс-шараларды айқындауға бағытталған. Жоба логистика, авиациялық мамандарды даярлау, коммерциялық және авиациялық инфрақұрылым бағыттарын қамтиды.
Меморандум аясында Азаматтық авиация академиясы кадрларды даярлау және инновациялық білім беру шешімдерін енгізу бойынша бейінді салалық әріптес ретінде белгіленді. Жобаны жүзеге асыру Алматы облысы, Ұйғыр ауданы, Бахар ауылында орналасқан Академияға тиесілі жер учаскесінде жүргізіледі.
Азаматтық авиация академиясының қытайлық әріптестерімен ынтымақтастығы тұрақты даму үстінде. 2024 жылдың қыркүйек айынан бастап Академия Қытайдың Тяньцзинь қаласының муниципалитетімен «Бір белдеу — бір жол» халықаралық жоба аясында жұмыс істеп келеді. Қытайдың азаматтық авиация университетімен бірлесіп, әуежайлардың цифрлық егіздерінің қытай-қазақ зерттеу орталығын құру жобасы жүзеге асырылуда. Бұл жоба авиациялық инфрақұрылымды басқару және қызмет көрсету бойынша зияткерлік жүйелерді дамытуға, сондай-ақ азаматтық авиацияны цифрлық түрлендіру үдерістерін қолдауға бағытталған.
Ынтымақтастық аясында тараптар азаматтық авиация саласындағы инновациялар жөніндегі бірлескен орталық құру мүмкіндігін қарастыруда.