Пхукет – Алматы бағытындағы әуе рейсі ұшып келгеннен кейін Алматы қаласы әуежайындағы желілік полиция бөлімінің қызметкерлері Алматы және Көкшетау қалаларының 26 жастағы тұрғындарын анықтап, ұстады.
Қазақстан Республикасының мемлекеттік шекарасын кесіп өту кезінде қызметтік-іздестіру иті жолаушыларда есірткі заты бар екендігі туралы белгі берді. Тексеру барысында олардан гашиш, кептірілген марихуана және синтетикалық есірткі табылып, тәркіленді, деп хабарлайды aqshamnews.kz Polisia.kz-ке сілтеме жасап.
Ұсталғандар өз әрекеттерінің заңсыз екендігін біле тұра, Таиландта демалыс кезінде есірткі сатып алып, жеке тұтыну үшін сөмкелерінде сақтаған. Аталған фактілер бойынша көлік полицейлері өткізу мақсатынсыз есірткі заттарымен заңсыз жұмыс және айналыстан алып қойылған заттардың контрабандасы үшін сотқа дейінгі тергеу жүргізді. Алматы қаласы Түрксіб аудандық сотының үкімдеріне сәйкес Көкшетау қаласының тұрғынына 1 жыл 9 ай мерзімге бас бостандығынан айыру түріндегі жаза тағайындалса, Алматы қаламының тұрғынына 200 АЕК (738 400 теңге) мөлшерінде айыппұл салынды.