Халықаралық World Boxing федерациясы 2026 жылғы 1 қаңтардан бастап өз жарыстарына қатысатын 18 жастан асқан ер спортшыларға міндетті жыныстық (sex) тексеру талабын енгізді, деп хабарлайды Aqshamnews.kz.
Ұйымның ресми мәліметінше, жаңа ереже World Boxing өткізетін немесе санкциялайтын барлық турнирлерге қолданылады. Енді 18 жастан асқан ер боксшылар жарысқа қатысу үшін ПЦР (PCR) немесе соған теңестірілген медициналық-генетикалық тексеруден өтуі тиіс. Тексерістің мақсаты – спортшының туған кездегі жынысын айқындау және тиісті санатта жарысқа қатысу құқығын растау.
World Boxing бұған дейін әйелдер санатында да осындай талап енгізілгенін еске салды. Міндетті тестілеу 2025 жылғы тамызда Ливерпульде өткен әлем чемпионаты қарсаңында қолданысқа енгізілген.
Бұл шешім спорттағы әділ бәсеке мен қауіпсіздік мәселесіне қатысты талқылар күшейген тұста қабылданды. Атап айтқанда, 2024 жылғы Париж Олимпиадасынан кейін алжирлік Иман Хелиф пен тайваньдық Линь Юйтиньдің төңірегінде тестостерон деңгейі мен сәйкестік талаптарына байланысты даулар болған.
Айта кетейік, 2025 жылғы қарашада World Boxing президенті болып қазақстандық боксшы Геннадий Головкин сайланды. Сарапшылар жаңа ережелерді ұйымдағы реформалардың бір бөлігі ретінде бағалап, оның негізгі мақсаты – бокста әділ бәсеке қағидаларын күшейту екенін айтады.
