Бұл туралы Ерлан Төлеутай Фейсбук парақшасына жазды.
Францияның Везуль қаласында өткен 31-ші Халықаралық Азия кинофестивалінде қазақстандық режиссер Елзат Ескендір "Әбіл" фильмі бірден үш негізгі номинация бойынша жеңіске жетіп, фестивальдің басты марапаттарына ие болды, деп хабарлайды aqshamnews.kz
Қазылар Гран-приі (Jury Grand Prize)
Киносыншылар жүлдесі (Critical Jury Prize)
NETPAC қазылар жүлдесі (NETPAC Jury Prize)
"Әбіл" фильмінің фестивальде қатарынан үш бас номинацияны жеңіп алуы оның көркемдік құндылығын айқын көрсетті.
“Бір айға жуық мерзімге созылған бұл сапарымыз бізге оңай болған жоқ. Десек те біз Еуропаның төрі – Швеция мен Даниядан және Францияның көрікті жерлерінен, тарихи орындарынан шама-шарқымыз келгенше ақпарат тарата алдық. Сондай-ақ конкурстан тыс қатысып, еуропалық премьерасын жасаған Швецияның Гетёборг және негізгі конкурсына қатысып, үш бірдей бәйгесін жеңіп алған Францияның Везуль халықаралық фестивальдерінен жүйелі репортаждар жасап тұрдық”- деп жазды Ерлан Төлеутай.
Сондай-ақ осы фильмге қолдау көрсеткендер отандастар мен қандастарға да алғыс білдірді.
“Жалпы біз осы жолғы сапарымызда қарапайым азаматтардың моральдық қолдауын жан-тәнімізбен сезіндік. Әсіресе Швеция мен Дания және Франциядағы отандастарымыз бен қандастарымыз бізге шын жүректен тілектестік білдірді. Сол үшін шетелдегі қазағым – Сіздерге шексіз алғысымызды білдіреміз!”- дейді ол.