Қазақстан Республикасы Мәдениет және ақпарат министрлігінің тапсырысы бойынша Қызылорда облыстық «Жас Ұлан» бірыңғай балалар мен жасөспірімдер ұйымы «Азаматтық бастамаларды қолдау орталығымен» бірлесіп, 2023–2024 жылдары «Fenomen Jas» әлеуметтік жобасын жүзеге асырды, деп хабарлайды aqshamnews.kz.
Жобаның мақсаты – тәуелсіздік жылдарында табысқа жеткен жастарды насихаттау, NEET жастарына үлгі болу, менторлық мектептерді дамыту және мемлекеттік бағдарламаларды іске асыруға белсенді жастарды тарту.
Жоба аясында қазақстандық табысты жастардың қатысуымен мотивациялық кездесулер, семинар-тренингтер, офлайн және онлайн іс-шаралар ұйымдастырылды. 100 күндік «Jastar tańdaýy» марафоны өткізілді, оның барысында жастарға шығармашылық, әлеуметтік, интеллектуалдық және физикалық бағытта тапсырмалар берілді. Екі жыл ішінде марафонға 237 адам қатысып, жеңімпаздарға 500 000 теңге көлемінде жүлде берілді.
Мемлекеттік бастамаларды талқылау үшін 3 қалада «Ted Talks» форматындағы іс-шаралар өткізілді. Сарапшылар сторителлинг форматында тәжірибелерімен бөлісіп, қатысушылар арасында нетворкинг ұйымдастырылды. Онлайн семинар-тренингтер арқылы қатысушылар soft skills, уақытты басқару және мақсат қою сияқты маңызды дағдыларды меңгерді.
Сонымен қатар, «Uly dala saryny» сыйлығы табысталды, оның жүлде қоры 2 миллион теңгені құрады. Жоба аясында жастардың жетістіктерін таныту үшін 10 сюжет, 5 подкаст және 4 бейнеролик дайындалып, кең аудиторияға ұсынылды.
«Fenomen Jas» жобасы жастардың белсенділігін арттырып, олардың қоғамға қосқан үлесін дәріптеуде үлкен рөл атқарды.