ҚР Премьер-Министрі Әлихан Смайыловтың төрағалығымен өткен Үкімет отырысында осы жылдың қаңтар-мамыр айларындағы Қазақстанның әлеуметтік-экономикалық дамуы және республикалық бюджеттің атқарылу қорытындылары қаралды,деп хабарлайды Almaty-akshamy.kz.
Есепті кезеңде республика экономикасы 4,5%-ға өсті.
Бес айдың қорытындысы бойынша өңдеу өнеркәсібі салалары республика экономикасының өсуіне негізгі үлесті қосып отыр.
Атап айтқанда, машина жасауда – 32%, оның ішінде автомобиль жасауда – 41%, сондай-ақ жеңіл өнеркәсіпте – 31% өсу динамикасы тіркелді. Негізгі капиталға салынған инвестицияның өсу қарқыны 17,2%-ды құрады. Жалпы есепті кезеңде барлық негізгі макрокөрсеткіштердің өсімі Абай, Ақмола, Батыс Қазақстан, Қостанай, Павлодар, Солтүстік Қазақстан, Ұлытау облыстары мен Алматы қаласында тіркелді. Ең төмен көрсеткіштер Атырау және Алматы облыстарында. Үкімет басшысы атап өткендей, халықаралық қаржы институттары әлемдік экономиканың өсу болжамдарын 2 есеге жуық азайтты.
«Алайда, сыртқы факторларға қарамастан, біз макроэкономикалық тұрақтылықты сақтап қана қоймай, экономиканың өсу қарқынын қамтамасыз етуіміз керек. Базалық салаларды сапалы дамытуға барынша көңіл бөліп, еңбек кірістерінің өсуі, сапалы жұмыс орындарын құру есебінен азаматтардың әл-ауқатын арттыру жөнінде белсенді шаралар қабылдануы тиіс», - деді Әлихан Смайылов.
Бұл ретте Премьер-Министр қаржылық тәртіпті күшейту маңызды екенін атап өтті, өйткені бағдарламалардың бірқатар әкімшілері бюджет қаражатын игермеген. Осыған байланысты ең үлкен әлеуметтік-экономикалық нәтижеге қол жеткізу үшін бюджет параметрлерінің сақталуын және қаражаттың тиімді бөлінуін қамтамасыз ету қажет.
«Тұрғын үй-коммуналдық шаруашылық инфрақұрылымын жөндеу және реконструкциялау бойынша жоспарланған инвестициялық іс-шаралардың орындалуы ерекше бақылауда болуы тиіс. Әлеуметтік-экономикалық дамудың барлық жоспарланған көрсеткіштеріне қол жеткізу керек», - деп қорытындылады сөзін Әлихан Смайылов.