АЭС-те жылу балансы деген ұғым бар, ол температураны реттеу үшін қажет. Жылуды алу үшін арнайы градирнялар қолданылады, сол себепті атом электр станцияларының жанында тұрған үлкен мұржалардан ақ бу шығады — бұл артық жылудың салдары.
Балқаш көлінің өзі жыл сайын шамамен 1,5 метр буланып отырады, бірақ әлі күнге дейін толық құрғаған жоқ. Ал атом станциясы көлден тек табиғи буланатын судың 0,32%-ын ғана пайдаланады. Бұл өте аз көлем, сондықтан ол Балқаштың су деңгейіне ешқандай әсер етпейді. Сонымен қатар, әлемде ешбір су қоймасы атом станциясы салдарынан кеуіп қалмаған. Керісінше, мұндай аймақтарда балық шаруашылығы дамып, балық аулау өнеркәсібі гүлденіп, халықаралық спорттық балық аулау турнирлері өткізіледі.
АЭС-ті су қоймаларының жанында салу — әлемдік тәжірибеде қалыпты жағдай. Балқаш көлінің суы станцияны тек салқындату үшін пайдаланылады, ал ешқандай пайдаланылған су қайтадан көлге құйылмайды. Су тек бір жақты қолданылады.
Сонымен қатар, радиацияның көлге түсу қаупі мүлдем жоқ, тіпті авария болған жағдайда да. АЭС-те екі жабық су контуры қолданылады: бірінші контур реактормен байланыста және толықтай оқшауланған. Ал екінші контур — кәдімгі су, ол жылытылады, буға айналып, турбинаны айналдырып, электр энергиясын өндіреді, содан кейін қайта салқындатылады. Бұл екі контур ешқашан бір-бірімен қиылыспайды, сол себепті экологияға қауіп төндірмейді.
Атом энергиясы — бұл тұрақты және экологиялық таза энергия көзі. Қазақстанның энергия қажеттілігін қамтамасыз ету үшін осы саланы дұрыс түсіну және дамыту өте маңызды.