Алматыда ерекше операция: екі жасар қызға ауыртпалықсыз өмір сыйлады
Алматы қаласында «Милосердие» қорының шеберлік сабағы және жоба серіктестері жүзеге асыратын әлеуметтік бастамалар аясында қазақстандық және ресейлік хирургтар бірлесіп күрделі операция жасады. Бұл операция екі жасар қыз балаға ауыртпалықсыз, толыққанды өмір сүру мүмкіндігін сыйлады.
Сәбиге сирек кездесетін диагноз — табанның эквино-плано-вальгус деформациясының ауыр дәрежесі қойылған. Бұл патология қозғалысын шектеп, ауырсыну тудырған. Хирургтар инновациялық тәсілдерді қолдана отырып, деформацияны түзетіп, Грайс әдісімен табан асты буынын артроэрездеу және металлоостеосинтез жасады. Ота барысында баланың өз сүйек тіні қолданылып, бұл асқыну қаупін азайтып, аяқ-қолдың дұрыс дамуына ықпал етті.
Қазақстандық хирург Ұлжан Сұлтанбекова мұндай күрделі отаны үш жасқа дейінгі балаға алғаш рет жасағандарын айтты:
«Біз инновациялық тәсілдерді қолдану арқылы деформацияны тиімді түзете алдық. Қазір қыздың аяғы анатомиялық тұрғыдан дұрыс қалыпқа келтірілді, бұл оған ауыртпалықсыз қозғалу мүмкіндігін береді.»
Хирургиялық операциялар халықаралық ынтымақтастықтың арқасында жүзеге асты. Ресейлік медицина ғылымдарының докторы Максим Вавилов пен қол хирургиясы бойынша маман Тимур Торноның рөлі ерекше болды. Олар операциялардан бөлек, қазақстандық мамандарға микрохирургияның заманауи әдістерін үйретті.
Максим Вавилов:
«Бұл бастама тек балаларға көмек көрсету емес, жергілікті дәрігерлердің тәжірибесін арттырудың да маңызды жолы.»
Тимур Торно:
«Елдер арасындағы ынтымақтастық медициналық саладағы озық әдістемелерді енгізуге мүмкіндік береді.»
Шеберлік сабағына 16 қазақстандық маман қатысып, тәжірибе жинақтады. Бұл шара «Милосердие» қоры, Алматы қаласының №2 балалар клиникалық ауруханасы және «Samruk-Kazyna Trust» қорының қолдауымен ұйымдастырылды.
Аурухана директоры Марат Рабандияров:
«Бұл шеберлік сабақтары тек балалардың өмірін жақсарту ғана емес, Қазақстанның медициналық мектебінің дамуына қосылған зор үлес. Бірлескен күш-жігеріміз арқылы әр балаға толыққанды өмір сүруге мүмкіндік береміз.»
Бұл бастамалар — медициналық қауымдастық, қайырымдылық ұйымдары және әлеуметтік серіктестердің бірлескен күш-жігерінің жарқын мысалы. Олар балалардың өмірін жақсартып, денсаулық пен бақытты өмір сүруге жол ашады.