Атырау облыстық халықтық штаб өкілдері АЭС құрылысы бойынша Атырау медицина колледжі ұжымымен кездесті.
Кездесуге ақпараттық үгіт-насихат жүргізетін жұмыс тобының мүшелері Айбар Ерекешов, Түркменбай Нұржігітов, Нұрбол Құрман және Фатима Тулееова қатысты. Олар алдағы 6 қазанда өтетін республикалық референдумның маңыздылығына тоқталды.
«Біз реформаларды нақты қадамдармен кезең-кезеңімен жүзеге асырып келеміз. Басты мақсат — әрбір азамат пен отбасының реформалар игілігін сезінуі. Референдум — бұл әр азаматқа өз елінің болашағына қатысты шешім қабылдауға тікелей қатысу мүмкіндігі. Энергетиканың дамуысыз ел экономикасының дамуы мүмкін емес. АЭС салу жаңа кәсіпорындардың ашылуы, жаңа жұмыс орындарының құрылуы және экономикалық өсудің негізгі факторына айналады», — деді қалалық мәслихат депутаты Нұрбол Құрман.
Өз кезегінде облыстық мәслихат депутаты Фатима Тулеева:
«Бүгінде көптеген инвестициялық жобалар бар. Қаржы бар, инвесторлар дайын. Алайда тұрақты энергия көздері жетіспейді. АЭС құрылысы еліміздің индустриализацияға өтуіне, шикізатқа тәуелділіктен арылуына ықпал етеді. Экономикалық тұрғыдан бұл елдің инвестициялық тартымдылығын арттырады», — деп атап өтті.
Кездесу барысында медицина қызметкерлері «АЭС-тің қандай қауіптері болуы мүмкін?», «АЭС құрылысының елге және аймаққа қандай пайдасы бар?», «Атом электр станциясын салуға қанша уақыт кетеді?» деген сұрақтарына толық жауап алды.