Мәжіліс мәдени іс-шараларда фонограмма қолдануға қатысты талаптарды күшейтті, - деп хабарлайды Aqshamnews.kz тілшісі.
24 қыркүйекте Мәжіліс мәдениет, білім беру, отбасы және мемлекеттік бақылау саласына қатысты заңнамалық түзетулерді екінші оқылымда қабылдады. Құжатта концерттер мен басқа да мәдени-бұқаралық іс-шараларда фонограмма қолдану ережелері қатаңдатылды.
Жұмыс тобының жетекшісі, депутат Ринат Зайыттың айтуынша, жаңа талаптар фонограммаға толық тыйым салуды көздемейді, бірақ 200 адамнан көп сыйымдылығы бар іс-шараларды қамтиды. Арнайы дыбыс құрал-жабдықтары жоқ немесе бейімделмеген алаңдарда фонограмма қолдануға рұқсат етіледі.
"Басты мақсат - көрермен құқығын қорғау. Билетке 25–50 мың теңге төлеген адам шынайы өнерді көріп, әншінің кәсіби дайындығын бағалай алуы керек. "Аузын жыбырлатқан" әртіс тыңдауға жол берілмеуге тиіс", - деді Зайыт.
Депутаттың айтуынша, заңсыз фонограмма пайдаланған жағдайда жауапкершілік іс-шара ұйымдастырушыларына жүктеледі. Бұл - концертке келісімшарт жасайтын, сахнаны жалдайтын және билет сататын тұлғалар. Қазіргі ұсынысқа сәйкес, айыппұл көлемі 1 000 айлық есептік көрсеткішке (шамамен 3,5 млн теңге) дейін жетуі мүмкін.
Жаңа нормалар мәдени іс-шаралардың сапасын арттыруды және көрерменнің ақшасына лайықты деңгейде өнер көрсетуін қамтамасыз етуді мақсат етеді.