Әлеуметтік желілерде «Ұшақ 30 минут кешіксе билет құны толықтай қайтарылады» деген ақпарат тарап жатыр. Оған сай, бұл өзгеріс жолаушылардың құқықтарына қатысты әуе компанияларына енгізілетін жаңа ережеге сай жасалады-мыс. Оқырманның сұрауы бойынша Factcheck.kz ақпараттың растығын тексеріп көрді, - деп хабарлайды aqshamnews.kz тілшісі.
Үкім: Жалған
Мәжіліс депутаты Мұрат Әбенов қаңтардың аяғында болған қоғамдық палатаның отырысында Ресейдегі әуе тасымалына қатысты «30 минут» практикасын мысалға келтірді. Кейін 26 қаңтарда Facebook-те Көлік министрі Нұрлан Сауранбаевпен болған кездесуде бұл практиканың Қазақстанға да керек екенін айтып, ұсынғанын мәлімдеді. Дегенмен бұл тек ұсыныс қана, ешқандай заңға өзгеріс енгізіліп, түзетулер жасалған жоқ. Ал Ресейде бұл ереже 1 наурыздан бастап күшіне енеді.
Депутат мәлімдемесінен кейін Қазақстандық бірқатар сайт мен парақша «Ұшақ 30 минутқа кешіксе, билет құны қайтарылады» деген тақырыпта жаппай жаңалық жаза бастады. Әбенов министрмен кездесуден кейін бұл мәселені депутаттармен талқылап, алдағы уақытта заңға түзетулер енгізілетіні туралы мәлімдеді.
Ал қазіргі «Әуе кеңістігін пайдалану және авиация қызметі туралы» заңының 86-бабы, 2-тармағына сәйкес, тасымалдаушының кінәсінен рейс 5 сағаттан астам кешіксе жолаушыға билеттің толық құнын қайтаруға міндетті.
Мұрат Әбенов қандай мәселе көтерді?
23 қаңтарда мәжілістің бірқатар депутаттары «Жолаушылар тасымалы саласындағы авиациялық қызмет мәселелері туралы» қоғамдық палатаның отырысын өткізді. Отырыста Азаматтық авиация комитетінің төрағасы 2025 жылды қорытындылап, баяндама жасады. Соңында сөз сөйлеген Мұрат Әбенов қайтарылмайтын билеттер мен әуе компаниясы ұсынған тарифтер жайынды пікір білдіріп, сынға алды. Оның ішінде «қайтарылмайтын билет» тарифі, ваучер мен билет құны жайында мәселе көтеріп, бизнес мүдделері қарапайым азаматтардың мүддесінен жоғары түратынын атап өтті. 26 қаңтарда Facebook-те осы жөнінде көлемді пост жазып, Көлік министрі Нұрлан Сауранбаевпен болған кездесуде бірқатар пункты ұсынғанын жеткізді. Олардың арасында мынадай ұсыныстар бар:
- Шартта барлық талаптар нақты жалыуы тиіс;
- Overbooking үшін айыппұл салынады, азаматтар 1000 АҚШ долларына дейін өтемақы алуы тиіс;
- Әуе компанияларына рейсті кешіктірсе, бортты ауыстырса және багажды кешіктірсе айыппұл салынуы тиіс;
- Билет ақысын ваучер жүйесімен қайтаруды толығымен жою және билет құнын 7 күн ішінде тек ақшамен қайтаруы керек;
- Әуе компаниясы рейсті 30 минутқа кешіктірсе билет құнын толық өтеуге тиіс;
- Кез келген айыппұлдар мен тарифтер компанияның ішкі құжаттарымен емес, Көлік министрлігі бекіткен тасымалдау ережелерімен негізделуі тиіс.