Иранда көп жылдар бойы қызу пікірталас пен наразылықтарға себеп болған міндетті хиджаб тағу мәселесінде маңызды өзгеріс қабылданды, деп хабарлайды Аqshamnews.kz тілшісі. Қатаң ережелер жеңілдетіліп, әйелдерге қатысты бұрынғы шектеулердің күші жойылды.
Иранның Мақсатқа сәйкестік кеңесінің мүшесі Мохаммадреза Бахонардың мәлімдеуінше, енді хиджабты міндетті түрде тағу талабы жоқ. Оның айтуынша, хиджаб кимейтін әйелдерге айыппұл да, жаза да, заңдық шектеулер де қолданылмайды.
Бұл шешімнен кейін елдің көшелері мен қоғамдық орындарында хиджабсыз жүрген әйелдерді жиірек көруге болады. Әлеуметтік желіде әйелдердің еркін жүріп-тұруын көрсететін бейнежазбалар жылдам таралып, қызу талқыға түсті.
Бұған дейін не болды?
Иранда хиджаб заңына қарсы наразылықтар 2022 жылы ерекше өршіп кеткен болатын. Сол кезде 22 жастағы Махса Амини есімді жас қыз "дұрыс киінбеді" деген айыппен "ар-намыс полициясы" тарапынан ұсталған соң көз жұмған. Бұл оқиға бүкіл елді дүр сілкіндіріп, әйелдер көпшілік алдында хиджабтарын шешіп, тіпті өз-өздерін өртеуге дейін барған. Акцияларды басу кезінде 550-ден аса адам қаза тауып, мыңдаған азамат тұтқындалған еді.
Сол наразылықтар кезінде Тегерандағы Ислам университетінің студент қыздарының бірі қудалаудан қашып, тіпті көшеде іш киіммен жүрген еді.
Ирандағы бұл жаңа шешім әйелдер құқығы мен еркіндігі тұрғысынан тарихи қадам ретінде бағаланып жатыр.
