Мемлекет басшысының Жарлығымен Светлана Қабыкенқызы Жақыпова Қазақстан Республикасының Еңбек және халықты әлеуметтік қорғау министрі лауазымынан босатылды, деп хабарлайды Aqshamnews.kz тілшісі Ақордаға сілтеме жасап.
Ресми құжатқа сәйкес, Светлана Жақыпова аталған қызметті 2023 жылғы 2 қыркүйектен бастап атқарып келген.
Светлана Қабыкенқызы Жақыпова 1968 жылы Қарағанды облысында туған. Целиноград мемлекеттік педагогикалық институтын және Алматы экономика және статистика академиясын тәмамдаған.
Еңбек жолын 1984 жылы Қарағанды облысындағы Қарой орта мектебінде мұғалім болып бастаған. 1997–2008 жылдары «Зейнетақы төлеу жөніндегі орталығы» РМҚК жүйесінде аға маманнан бастап директорға дейін түрлі лауазымдар атқарған.
2008–2011 жылдары министрліктің әлеуметтік қорғау және әлеуметтік сақтандыру департаментін басқарған. 2013–2019 жылдары Еңбек және халықты әлеуметтік қорғау министрінің орынбасары болды. Кейін БҰҰ Даму бағдарламасында ұлттық сарапшы қызметін атқарып, 2023 жылы Президент жанындағы әлеуметтік осал санаттардың құқықтары жөніндегі уәкіл ретінде жұмыс істеген.