Сарыарқаның төрінде бой түзеген елордамыз Астана – тәуелсіз Қазақстанның ғана емес, бүкіл Евразияның жүрегіне айналған ару қала. Бүгін, 6 - шілде Астананың туған күні. Осыдан 27 жыл бұрын астанамыз белгіленіп, өзінің тарихи датасын қалыптастырған еді. Содан бері не өзгерді? Қандай ғимараттар бой көтерді? Аqshamnews.kz тілшісі елорданың туған күніне орай тарих кеңістігіне сыр шертіп, Астананың алғашқы келбетінен кадрларды жинақтады.
Сол жақ жағалаудың тынысы
Астана күнін бүкіл Қазақстан болып алғаш рет 2006 жылы 6 шілдеде атап өтті. Араға тағы екі жыл салып 2008 жылы 18 шілдеде бұл күн ресми түрде мемлекеттік мереке мәртебесіне ие болды. Биыл еліміздің бас қаласы Астананың астана мәртебесін иеленгеніне 27 жыл толып отыр.
1990 жылдары сол жағалау кең жазық дала болатын. Уақыт өте келе бұл жер Астананың келбетіне айналды. Қазір елорда десе бірден сол жақ жағалаудағы ғимараттар елестейді.
сурет: informburo.kz
"ҚазМұнайГаз" және "Нұржол" бульвары
Қала символына айналған тағы бір нысан - бұрынғы "ҚазМұнайГаз" ғимараты. 2002 жылы салынған бұл нысанда бүгінде түрлі мемлекеттік мекемелер мен энергетика министрлігі орналасқан. Ал "Нұржол" бульварының бойында орналасқан маңызды ғимараттар "Солтүстік шұғыла" ТК – 2008, ҚТЖ ғимараты – 2009, "Казмедиа орталығы" – 2011, "Изумрудный квартал" – 2011 жылы соғылған.
"ҚазМұнайГаздың" артында 2010 жылы "Хан Шатыр" сауда-ойын-сауық орталығы, ал 2013 жылы жанында "Астана Опера" театры салынды.
"Астана Триумфы" мен Тұран даңғылы
2006 жылы салынған "Астана Триумфы" ғимаратының арт жағында бүгінде бірнеше тұрғын кешен бар: Grand Opera, Sensata, "Дельфин". Сонымен қатар, қазір Тұран даңғылының бойында бой түзеген мейрамханалар аллеясы да қалаға ерекше сән береді.
Ленин алаңынан - Парламентке
Бұрынғы Ленин алаңы - кезіндегі Целиноградтың символы болатын. 1979 жылы мұнда "Целингипросельхоз" жобалау институтының 16 қабатты ғимараты салынды. Ақмола астана болған соң мұнда Парламент көшіп келді. Қазір бұл нысан - Президент жанындағы Мемлекеттік басқару академиясы.
1964 жылы салынған Кеңестер үйі Ақмола астана мәртебесін алған соң Үкімет резиденциясына айналды. Бүгінде бұл жерде Астана қаласы әкімінің аппараты орналасқан.
Жастар сарайы
Жастар сарайы - алғашында "Жастар үйі" ретінде жобаланып, 1974 жылы ашылды, Қарсы бетінде орналасқан "Турист" қонақ үйі (1984) әлі күнге дейін өзінің атауын сақтап отыр.
Ескі вокзал
Целиноградтың ескі теміржол вокзалы - 60 жылдан аса тарихы бар нысан. Қазір - қосалқы терминал, ал 1990 жылы салынған жаңа биік ғимарат - негізгі вокзал ретінде қызмет етіп отыр.
суреттер: informburo.kz