Еліміздегі ТОП-5 курорттық өңір белгілі болды
Еліміздің ең тартымды курорттық өңірлер рейтингінде Алматы тау кластері көш бастап тұр. Өңірге 1 996 801 турист сапарлаған, деп хабарлайды aqshamnews.kz.
Маңғыстаудың көрікті пейзаждары мен Каспий теңізінің жағалауында 325 013 турист демалған.
Рейтингте үшінші орыннан көрінген Щучье-Бурабай курорттық өңірі. Орманы, көлдері және курорттық кешендерімен әйгілі бұл өңір 275 295 саяхатшыны қабылдаған.
Алакөл көлінің Абай облысындағы аумағына 125 621, Жетісу облысындағы бөлігіне 113 059 турист барған. Осылайша, бұл өңір рейтингте төртінші орынды иеленді.
Ал ТОП-5 курорттық өңір тізімін Балқаш курорттық өңірі түйіндеді. Бұл аймақ былтыр 9 айда 120 948 турист қабылдаған.
2024 жылдың қаңтар-қыркүйек аралығында Қазақстанның курорттық өңірлеріне 3,4 миллион турист келді. Қонақ үйлер мен орналастыру орындары көрсеткен қызмет көлемі 129 миллиард теңгеге жетті.