Елде әуе қатынасына сұраныс артып келеді.
Өткен жылы отандық компаниялар 11 млн жолаушыны тасымалдаған. Салада серпіліс бар, бірақ сұраныс көбейген сайын маман тапшылығы мәселесі де сезілуде, деп хабарлайды Almaty-akshamy.kz.
24.kz ақпаратына жүгінсек, сарапшылардың айтуынша, Қазақстанда білікті ұшқыштар жетіспейді. Сондықтан отандық әуе компаниялары оларды амалсыз шетелден шақыруға мәжбүр. Алғашқы 4 айда отандық әуе компаниялары 4 млннан аса жолаушы тасыды. Одан бөлек былтыр елде 410 мың ұшаққа қызмет көрсетілді. Бұл 2021 жылмен салыстырғанда 90%-ға артық. Ресми статистика әуедегі қозғалыстың қарқынды өсіп жатқанын көрсетеді. Алайда нарықтағы сұранысты білікті отандық мамандармен қамтамасыз ете алмай отырмыз. Қазір азаматтық авиация академиясында 1400 адам оқиды. Жылына 400 түлек бітіреді. Оның 40-ғы ұшқыш. Бірақ бұл жеткіліксіз. Оның үстіне түлектердің біліктілігіне де сұрақ көп.
«Ұшқыштар саласында келсек, кішкене мәселелер бар. Өйткені Эйр Астанада Еуроодақтың дәрежесіндегі талап бар. Біз оған жеткен жоқпыз. Оған дайындап жатырмыз. Енді Еуропа Одағының талабына сай келеді деп жатырмыз. Бірақ сертификатымызды әлі алған жоқпыз. Біздің стратегиямыз бойынша 2025 жылы Еуропа Одағының сертификатын алуымыз керек», - дейді Азаматтық авиация академиясының ректоры Бекен Сейдахметов.
Елде ұшқыштарды дайындайтын жалғыз академия осы. Қазір мұндағылар әлемдегі үздік оқу орындарына берілетін еуропалық сертификатты алуға дайындалып жатыр. Бірақ академия әлі де техникалық жабдыққа зәру. Білім ордасына ұшақтан бастап, жоғарғы стандарттарға сай заманауи құрылғылар қажет.
«Жетіспейтін тікұшақтар бар. 2015 жылдан бастап тікұшақтарды дайындау жүріп жатыр. Тікұшақ жоқ болғанан кейін жалға аламыз. Ұшақтардың да жетіспеушілігі бар. Өзіміздің ұшақтар бар, бірақ ұшқыштардың ткөптігінен біз ұшақтарды арендаға алуға мәжбүрміз», - дейді Азаматтық авиация академиясының ұшу жаттығу, ұшқыштарды дайындау, ұшу орталығының директоры Дәулет Төреахметов.
Академиядағы оқытушылар мен нұсқаушылардың да біліктілігін арттыру керек. Қазір бірқатары Еуропада оқып жатыр. Маман тапшылығын шешуге әуе компанияларының өздері де атсалысуда. Соның бірі - Эйр Астана компаниясы. Олар азаматтарды толық оқытып, жұмысқа қабылдап жатыр.
«Қазір әлемдегі алпауыт компанияларының басым бөлігінде маман тапшы. Тиісінше, бізде де дефицит бар. Ұшқыштардың жеткілікті болғанымен, алда жаңа әуе кемелері қосылады. Сондықтан шетелдегі білікті мамандардың көмегіне жүгінеміз. Отандық мамандарды даярлауға да атсалысып жатырмыз. Біздің арнайы бағдарламамыз арқылы оқып, қазір жұмыс істеп жүрген қызметкерлеріміз бар», - дейді әуе компаниясының менеджері Ілияс Исабаев.
Сала мамандарының пікірінше, мәселені шешу үшін білім беру ісіне инвестиция тарту керек. Сонда кәсіби ұшқыштар ғана емес, техникалық мамандарды да көбейтуге мүмкіндік болады. Маман тапшылығы әлем бойынша бар көрінеді.
«Әлемде әуе қатынасына сұраныс артып отыр. Тиісінше, маман тапшылығымен жаһандағы кез келген әуе компаниясы кезігіп отыр. Біз білім беру жүйесіне инвестиция тартуды жеделдетуіміз керек. Кей әуе компаниялары ұшқыштарды өздері оқытады. Бұл тәжірибеге де мән берген жөн. Саланы серпілтуге мемлекеттің қолдауы да артық етпейді», - дейді Қазақстанның авиациялық әкімшілігінің бас директоры Каталин Раду.
Қазір елдегі авиация саласында 20 мың адам жұмыс істейді. Жылдан-жылға маман тапшылығы мәселесі көбейіп келеді. Бірақ нақты қай мамандыққа адам керек, қай бағытта тапшылық көп екені зерттелмейді. Азаматтық авиация өкілдері қолда нақты статистика болса, сол бағытқа басымдық берер едік дейді.