Бүгінде жол бойында 1 465 нысан жұмыс істеп тұр, деп хабарлайды aqshamnews.kz тілшісі.
Қазіргі уақытта елімізде 37 автомобиль өткізу пунктінде жаңғырту жұмыстары жалғасуда. Олар келесі жылдың соңында аяқталады. Бұл туралы Үкімет үйінде Мемлекет басшысының «Жаңа тарихи кезеңдегі Қазақстанның өзекті міндеттері» атты Жолдауында берілген міндеттер аясында экономиканың нақты секторын дамыту мәселелері туралы өткен баспасөз конференциясында Премьер-министрдің бірінші орынбасары Нұрлыбек Нәлібаев айтты.
Көлік саласында 712 млн тонна жүк тасымалданды, бұл өткен жылдың сәйкес кезеңімен салыстырғанда 0,9%-ға артық.
Шамамен 1,5 млрд жолаушы тасымалданып, өткен жылдың сәйкес кезеңімен салыстырғанда 3,4%-ға өсті.
Теміржол көлігімен транзиттік жүк тасымалдау көлемі 33,8 млн тоннаға жетіп, 15%-ға ұлғайды.
«Барлық негізгі көрсеткіштер бойынша оң серпін байқалады. Мемлекет басшысы Қазақстан халқына Жолдауында елімізді Еуразияның көлік-логистика хабына айналдыру жөнінде нақты мақсат қойды. Біз көлік инфрақұрылымын дамытуға басымдық береміз. Қазіргі уақытта 37 автомобиль өткізу пунктін жаңғырту жұмыстары жалғасуда. Оларды келесі жылдың соңына дейін аяқтаймыз. Жүк тасымалдаушыларға қолайлы жағдай жасау мақсатында шекарадан бастап халықаралық автодәліздердің бүкіл бағыттары бойынша – жол бойындағы инфрақұрылымды дамыту жұмыстары жүргізілуде», – деді Нұрлыбек Нәлібаев.
Оның айтуынша, бүгінде жол бойында 1 465 нысан жұмыс істеп тұр. Соңғы 3 жылда 221 нысан бой көтерді. Аталған жобаларға ірі компаниялар инвестиция салған. Бұл нысандар – сапа мен жайлылықтың жоғары стандарттарына сай келетін жанармай құю стансалары, қонақүйлер, дүкендер және техникалық қызмет көрсету стансалары орналасқан жол бойындағы тұтас сервистік кешендер.