Қазақстанда алғашқы атом электр станциясына атау беруге жалпыхалықтық конкурс басталды,- деп хабарлайды Aqshamnews.kz тілшісі.
25 қыркүйек сағат 12:00-де елімізде алғашқы атом электр станциясына (АЭС) атау беру бойынша жалпыхалықтық конкурс ресми түрде басталды. Сауалнама eGov Mobile мобильді қосымшасында өтеді. Қатысу үшін қосымшада "АЭС-ке атау ұсыныңыз" баннерін басып, өз нұсқаңызды жолдау жеткілікті. Пайдаланушыларға конкурстың басталғаны туралы арнайы push-хабарламалар жіберіледі.
Ұйымдастырушылардың мәліметінше, бастаманың мақсаты - болашақ станцияға елдің тарихи, мәдени және ұлттық ерекшелігін бейнелейтін мағыналы атау таңдау. Азаматтар қазақ немесе орыс тілін таңдап, атаудың мәнін қысқаша түсіндіріп жазуы керек. Сонымен қатар қатысушылар ресми қағидалармен танысқанын растауы қажет. Ұсыныстарды қабылдау 2025 жылғы 10 қазан, сағат 23:59-ға дейін жалғасады.
Конкурс ережелерімен атом энергиясы жөніндегі агенттіктің ресми сайтында және әлеуметтік желілерінде танысуға болады.
Ұйымдастырушылар барлық қазақстандықты энергетика саласының тарихына үлес қосып, еліміздің алғашқы АЭС-на лайықты атау ұсынуға шақырады.
Еске салайық, 11 тамызда Президент Қасым-Жомарт Тоқаев Қазақстандағы алғашқы атом электр станциясына атау табу үшін ашық конкурс өткізуді ұсынған болатын. Жобаға энергетика министрі Алмасадам Сәтқалиев, оның орынбасары Тимур Жантикин, Мәжіліс пен Сенат депутаттары, журналистер, жазушылар, ғалымдар және блогерлерден құралған комиссия жетекшілік етеді.