Қазақстанда отандық фармацевтика үлесін арттыру мақсатында төрт жаңа зауыт салынады, деп хабарлайды Aqshamnews.kz тілшісі.
Премьер-министрдің ресми ақпараттық ресурсының мәліметінше, Үкімет Президент Қасым-Жомарт Тоқаевтың тапсырмасына сәйкес төрт компаниямен жалпы құны 173 млрд теңге болатын инвестициялық келісімдерді мақұлдаған. Тиісті қаулыға Премьер-министр Олжас Бектенов қол қойды.
Жобалар аясында 356 атаулы дәрі-дәрмек, оның ішінде әлеуметтік маңызы бар препараттар өндіріледі. Олар онкологиялық, эндокриндік ауруларға арналған дәрілерді, сондай-ақ вирусқа қарсы, иммунобиологиялық және қабынуға қарсы медициналық құралдарды қамтиды.
Фармацевтикалық зауыттар Алматы қаласында (екі зауыт), Түркістан және Алматы облыстарында бой көтереді. Инвестжобалар нәтижесінде 675 жаңа жұмыс орны ашылады.
Жаңа өндірістер іске қосылған соң, елдің дәрі-дәрмекке импортқа тәуелділігі төмендеп, отандық медициналық өнімдердің қолжетімділігі артады.
