Еуразиялық интеграция институты жүргізген сауалнама бойынша Exit poll нәтижесі жарияланды, – деп хабарлайды aqshamnews.kz тілшісі.
Қазақстандықтардың 86,7%-ы "Иә, қабылдаймын" деп жауап берген.
Еуразиялық интеграция институты Қазақстанның 17 облысында, Астана, Алматы, Шымкент қалаларында Exit poll – референдум учаскілерінен шыға берісте азаматтарға сауалнама жүргізді. Сауалнама 200 референдум учаскісін қамтыды, оның ішінде 129 – қалаларда, 71 – ауылдық жерлерде орналасқан.
Қазақстандықтар референдумда қалай дауыс берді?
15 наурызда Қазақстанда жаңа Конституция бойынша референдум өтті. Ел бойынша дауыс беру учаскелері таңғы 7:00-ден кешкі 20:00-ге дейін жұмыс істеді.
Дауыс беру құқығына 18 жастан асқан және сайлаушылар тізіміне енгізілген Қазақстан азаматтары ие болды. Тізімге барлығы 12 461 796 адам енгізілді.
Референдум күні ел бойынша 10 388 дауыс беру учаскесі жұмыс істеді. Сонымен қатар, Қазақстанның 54 елдегі дипломатиялық өкілдіктері жанынан 71 учаске ашылды.
92 учаскеде, негізінен әскери бөлімдерде, комиссиялар жұмысын ертерек – 06:00-де бастады.
10:00-ге қарай бюллетень алған қазақстандықтар саны 2 393 844 адамды құрады. Бұл дауыс беру құқығы бар азаматтардың 19,21%-ы.
12:00-ге қарай олардың саны 4 677 595 сайлаушыға жетті, яғни тізімге енгізілген азаматтардың 37,54%-ы.
14:00-де референдум өтті деп жарияланды. Дауыс беруге 6 471 378 адам қатысты. Осы уақыттағы қатысу деңгейі 51,93% болды.
Анықтама: Заң бойынша, егер дауыс беруге қатысқан азаматтар саны барлық сайлаушылардың жартысынан асса, референдум өтті деп танылады.
16:00-ге қарай учаскелерде 8 029 286 адам дауыс берді.
18:00-ге қарай сайлаушылардың 70%-дан астамы, яғни 8 845 280 адам өз дауысын берді.
20:00-ге қарай референдумға 9 126 850 адам қатысты.
Орталық референдум комиссиясы алдын ала 73,24% қатысу деңгейін тіркеді.
Қорытынды нәтижелер 2026 жылғы 21 наурызға дейін жарияланады.