Биыл Қазақстанның жалпы ішкі өнімі 6 пайызға өсті, - деп хабарлайды Аqshamnews.kz тілшісі.
Ұлттық статистика бюросының алдын ала деректеріне сәйкес, 2025 жылғы қаңтар-мамыр айларында Қазақстанның жалпы ішкі өнімі былтырғы осы кезеңмен салыстырғанда 6 пайызға өскен.
Мұндай нәтижеге өнеркәсіп пен құрылыс салаларынан бастап сауда, көлік жәнебайланысқа дейінгі негізгі салалардағы өсім қарқынының жеделдеуі ықпал етті.
Өнеркәсіп өндірісі 6,4 пайызға артты. Елдің 17 өңірінде өсім байқалды: ең жоғары өсім +22,9 пайыз көрсеткішімен кен өндіру, тыңайтқыштар, портландцемент пен қант өндірісінің белсенді дамуының нәтижесінде Жамбыл облысында тіркелді. Түркістан және Жетісу облыстарында өндіріс 14,8 пайызға, Алматы қаласында 14,1 пайызға өсті. Шымкент қаласында өсім 18,9 пайызға жетті.
Ауыл шаруашылығындағы өсім 4,0 пайызды құрады (қаңтар-сәуір айларындағы 3,9 пайызбен салыстырғанда). Ең айқын өсім Атырау облысында (+10,4 пайыз), Солтүстік Қазақстан облысында (+7,5 пайыз) және Ақмола облысында (+6,5 пайыз) тіркелді, бұл негізінен мал мен құс сойымының артуы есебінен болды. Түркістан облысында өсім 6,3 пайызды, Абай облысында – 3,6 пайызды, ал Қостанай облысында – 4,8 пайызды құрады.
Құрылыс саласы қарқынды дамып келеді, 15,4 пайызға өсті. Он сегіз өңірде өсім тіркелді, ал Маңғыстау облысында мектептер, тұщытқыш зауыт, мұнай және су құбырларын қайта жаңарту, аудандық аурухана және автожолдарды жөндеу сияқты ауқымды жобалардың арқасында жұмыс көлемі екі есеге артты. Қызылорда облысында өсім 64,5 пайызды, Қостанайда – 57,8 пайыз, Астанада – 51,8 пайыз, Түркістан облысында – 46,6 пайыз болды. Тұрғын үй құрылысы да қарқын алып келеді: бес айдың ішінде 6 млн шаршы метрден астам тұрғын үй пайдалануға берілді, бұл былтырмен салыстырғанда 5,7 пайызға көп. Ең белсенді құрылыс Түркістан облысында (+25,5 пайыз), Шымкент қаласында (+23,4 пайыз) және Алматы облысында (+20,4 пайыз) байқалды.
Негізгі капиталға салынған инвестиция18,2 пайызға артты. Бұл өсім көлік, өндірістік және әлеуметтік инфрақұрылымға, сондай-ақ жабдықтар мен жаңа өнеркәсіптік нысандарға бағытталған қаржы салымдарының есебінен қамтамасыз етілді.
Сауда айналымы 7,8 пайызға артты (қаңтар-сәуір айының қорытындысындағы 7,0 пайызбен салыстырғанда). Ішкі сауда құрылымында көтерме сауданың үлесі шамамен 68 пайызды құрайды. Ағымдағы жылдың қаңтар-мамыр айларында көтерме сауда 8,3 пайызға, бөлшек сауда 6,5 пайызға өсті.
Өсім қарқыны бойынша Түркістан облысы (+66,2 пайыз), Ақмола облысы (+48,9 пайыз) және Шымкент қаласы (+23,1 пайыз) алдыңғы қатарда.
Байланыс және телекоммуникация саласы 2,8 пайызға өсті. Бұл Интернет желісі қызметтері есебінен (+13,9 пайыз).
Көлік саласы 23,1 пайыздық өсім көрсетті — бұл көбінесе жүк теміржол көлігінің (+17 пайыз) және құбыр арқылы тасымалдаудың өсуінебайланысты (+13,8 пайыз). Ең жоғары өсім Жетісу облысында (+39,1 пайыз), Абай облысында (+17,7 пайыз) және Ақтөбе облысында (+11,3 пайыз) тіркелді.
Үкімет елдің тұрақты әлеуметтік-экономикалық дамуын қамтамасыз ету жөніндегі Президенттің тапсырмаларының орындалуын жеке бақылауда ұстауды жалғастырып келеді.