Бүгін Алматыдағы сайлау учаскелерінің бірінде екі буын өкілінің жолы тоғысты, – деп хабарлайды aqshamnews.kz тілшісі.
Елена Михайленко азаматтық ұстанымын білдіріп, ел болашағы үшін таңдау жасауға келсе, 18 жастағы Алика Жапарова алғаш рет сайлау құқығын пайдаланды.
Елена Михайленко үшін дауыс беру – Қазақстанның болашағына қатысты өз көзқарасын білдірудің мүмкіндігі.
«Мен бүгін Қазақстанның жаңаруы үшін, елімізді он жылдан кейін қандай деңгейде көргім келсе, сол болашақ үшін дауыс беруге келдім. Осы мәселеге қатысты пікірімді білдіруді азаматтық міндетім деп санаймын», – деді ол.
Алика Жапарова үшін бұл күннің маңызы ерекше. Ол – №95 мектептің түлегі. Биыл 18 жасқа толып, алғаш рет сайлауға қатысып отыр.
«18 жасқа толған соң сайлауға келіп, дауыс беруді жөн көрдім. Бұл мен үшін маңызды», – деді жас алматылық.
Қазақстанды он жылдан кейін қандай ел ретінде елестететіні туралы сауалға Алика елдің дамуына және жас буынның әлеуетіне сенетінін айтты.
«Он жылдан кейін Қазақстанды өркендеген ел ретінде елестетемін. Қазір жастарымыз IT-технология, қоғамдық және саяси өмір секілді түрлі бағытта белсенді дамып келеді. Жастар барлық салада өз орнын көрсетіп жүр», – деді ол.
Осылайша бір сайлау учаскесінде аға буынның тәжірибесі мен жастық жігер тоғысты. Аға буын үшін дауыс беру – елдің алдағы даму бағытына өз үлесін қосу мүмкіндігі болса, ересек өмірге енді қадам басқан жастар үшін – ел болашағына араласудың алғашқы қадамы.
Екі буын, түрлі көзқарас пен өмірлік тәжірибе. Бірақ ортақ тілек бір – Қазақстанды қуатты, дамыған әрі өркендеген ел ретінде көру.