Бұрын көтерілген мәселелердің 85%-ы шешілді.
Алматы әкімі Ерболат Досаев қаладағы Жетісу ауданының тұрғындарымен кезесу барысында жасалып жатқан жұмыстар туралы айтты, деп хабарлайды Almaty-akshamy.kz.
Қазіргі уақытта ауданда су және электрмен жабдықтау, көшелерді су басу және көлік-жол инфрақұрылым мәселелерін шешу, әлеуметтік саланы дамыту мен абаттандыру бойынша қарқынды жұмыстар жүріп жатыр.
«Сіздердің өтініштеріңіз бойынша осы жылдың тамыз айында Рабочий кентіндегі 22 көшенің сумен жабдықтау және кәріз желілері «Алматы Судың» балансына берілді. Қазіргі уақытта 47 км желі сынақтан өткізіліп жатыр. Олардың 37 км – сумен жабдықтау, 10 км – кәріз желілері. Сынақ жүргізілгеннен кейін келесі жылдың сәуір айында оларды пайдалануға беру көзделген. Сонымен қатар, биыл қазан айының соңына қарай Қазыбаев – Рысқұлов – Тәтібеков - Райымбек көшелерінің шегіндегі сумен жабдықтау желілерін реконструкциялау және кәріз желілерін салу жұмыстарын аяқтау жоспарланған (су құбыры – 43 км, кәпіз – 15 км, 2019 жылы «Алвис» жауапкершілігі шектеулі серіктестігі бастады). Жұмыстар 90%-ға орындалды, 30 көшеге асфальт төселді», - деді Ерболат Досаев.
Сонымен қатар, әкімнің айтуынша, Палладин – Павлодар – Сельская – Боралдай көшелері және "Кемел" шағынауданының тұрғындарын электр энергиясымен үздіксіз қамтамасыз ету үшін осы жылдың мамыр айында 40 км ескірген желілерді реконструкциялау жұмыстары басталды.
«Қазір осы мекенжайларда мердігер ұйымдар («ABM Building» және «ЕС Энерджи») темірбетон тіректерді орнатып, кабель желілерін тарту жұмыстарын жүргізуде. Қазірдің өзінде 600 тірек орнатылды, 10 км кабель тартылды. Палладин – Павлодарская – Сельская - Боралдай көшелеріндегі жұмыстар осы жылдың соңына дейін, Кемел шағын ауданындағы жұмыстар 2023 жылдың сәуір айында аяқталады.Бұл 4 000-нан астам абонентті электр энергиясымен үздіксіз қамтамасыз етуге мүмкіндік береді», - дейді әкім.