Қазақстанда әлеуметтік желіде заңға қайшы контент жариялаған тоғыз стример әкімшілік жауапкершілікке тартылды, – деп хабарлайды aqshamnews.kz тілшісі. Бұл туралы Ішкі істер министрлігі мәлімдеді.
ІІМ мәліметінше, аталған азаматтар лайк, қаралым мен донат жинау үшін тікелей эфирлерде балағат сөз айтып, әдепсіз әрекеттер көрсеткен, қауіпті пранктер ұйымдастырып, қоғамдық тәртіпті бұзған. Ведомство мұндай контентке кәмелетке толмағандардың да күн сайын куә болып отырғанына ерекше назар аударды.
Астана қаласының тұрғыны Индира Ештаева TikTok-тағы тікелей эфир барысында балағат сөздер айтып, заңға қайшы контент таратқаны үшін ұсақ бұзақылық бойынша әкімшілік айыппұл алды.
Алматыда Ақтөре Батырбек тікелей эфир кезінде айналасындағыларды балағаттап, қоғамдық тәртіпті бұзғаны үшін сот шешімімен бес тәулікке әкімшілік қамауға алынды.
Шымкентте 20 жастағы Данияр Сейдалиев көрермен жинау мақсатында тікелей эфирде электрошокер қолданып, адам ұрлау көрінісін қолдан ұйымдастырған. Сонымен қатар эфир барысында балағат сөздер айтып, қоғамдық тәртіпті өрескел бұзғаны үшін сегіз тәулікке қамалды.
Жамбыл облысында «Алтын қыз» лақап атымен танылған Лайло Қасымова бірнеше мәрте заңға қайшы контент таратқаны үшін әкімшілік жауапкершілікке тартылып, айыппұл салынды.
Сондай-ақ осы өңірде 19 жастағы Жарқынай Байбек пен Асылжан Танабергановтың донат пен аудитория жинау үшін тікелей эфирде әдейі бір-біріне дене жарақатын салып, жанжал ұйымдастырғаны анықталған. Екеуі де әкімшілік жауапкершілікке тартылды.
ІІМ құқық қорғау органдарында әлеуметтік желідегі анонимді аккаунттардың иесін анықтауға мүмкіндік беретін барлық қажетті құралдар бар екенін ескертті. Ведомство цифрлық кеңістікте заң бұзатындарға қатысты шаралар алдағы уақытта да жалғасатынын мәлімдеді.
Министрлік өкілдерінің айтуынша, жастарға теріс үлгі көрсететін, зорлық-зомбылықты, дөрекілік пен қорлауды насихаттайтын контентке жол берілмейді. Ал азаматтардан келіп түсетін әрбір шағым міндетті түрде қаралып, заң бұзғандардың барлығы жауапқа тартылады.