Алматыда өтетін Дженнифер Лопестің Up All Night әлемдік турындағы концертіне 8 мыңнан астам шетелдік турист арнайы келді, деп хабарлайды Aqshamnews.kz.
Алдын ала мәліметке сәйкес, көрермендердің үштен бірі — түрлі елдерден келген қонақтар.
Концерт билеттері толық сатылып кеткен. Оларды 35-тен астам елдің тұрғындары сатып алған, оның ішінде ТМД, Еуропа, АҚШ, БАӘ, Канада, Түркия, Жапония, Қытай және Оңтүстік Корея бар.
Туристердің Алматыда орташа тоқтау мерзімі — 3-5 күн, ал шығындары 1 500 АҚШ долларына дейін жетеді. Бұл қаржы қонақүйлерге, мейрамханаларға, көлік, экскурсия және саудаға жұмсалады.
Концерт Алматының халықаралық мәдени орталық ретіндегі мәртебесін арттырып, туризм мен экономиканың дамуына серпін бермек.
Дженнифер Лопестің Алматыдағы концерті қазақстандық жанкүйерлердің өтініші бойынша тур бағдарламасына енгізілген.