Әнші, Қазақстанның халық әртісі Димаш Құдайберген осы себеппен Түркістанда жүр.
Ол өңірдегі Ақмешіт үңгірінде бейнебаян түсірмекші, деп хабарлайды aqshamnews.kz.
Түркістан әкімі Дархан Сатыбалды өнер иесімен арнайы кездесіп, құрмет көрсетті.
Димаш Құдайбергеннің өзі Түркістанның жаңа кейпіне таңданысын жасырмады.
- Түркістанның жаңа кейпіне, өзгеріске таңғалдым. Ұнап жатыр барлығы. Ес білгелі алғаш рет келуім, ерекше әсер алдым. Елдің осындай әдемі шаһарда тұрып жатқанын, еңсесі көтеріліп жатқанын көргеніме қуанып отырмын. Түркістан бүгінде түркі әлемінің туристік астанасына айналып, дүние жүзіне танылып жатыр. Ең бастысы еліміз тыныш болсын! Қалаларымыз әлемге танылып, халқымыздың дүниетанымы, руханияты көкжиегі кеңейе берсін!, – деді Димаш Құдайберген.