Мәжіліс депутаттары әлеуметтік желі мен ақпараттық кеңістікте ЛГБТ тақырыбындағы насихатқа тыйым салу туралы бастаманы қайта көтерді, деп хабарлайды Aqsham.news.
Ұсыныс мұрағат ісі мәселелеріне арналған заң жобасына енгізілмек. Депутат Наталья Дементьеваның айтуынша, түзету дәстүрлі емес жыныстық қатынастарды жарнамалау мен насихаттауға шектеу қоюды көздейді.
“Бұл өзгеріс әлеуметтік желілермен қатар, фильмдер мен жарнамаларға да қатысты. Балалар мұндай мазмұндағы контентті ашық көрмеуі тиіс”, – деді депутат.
Оның айтуынша, қазіргі таңда әлеуметтік желілерде ЛГБТ қатынастарын “қалыпты құбылыс” ретінде көрсететін бейнематериалдар мен жазбалар жиі кездеседі.
“Қазір тоқтатпасақ, Батыстағыдай жағдайға жетуіміз мүмкін. Онда бала туған кезде жынысы көрсетілмей, кейін өзі таңдайды”, – деді Дементьева.
Жұмыс тобының отырысына қатысқан оннан астам депутат бастаманы бірауыздан қолдап, өздерін түзету авторлары қатарына қосуды сұраған. Олардың қатарында Ринат Зайыт, Еділ Жаңбыршин, Ардақ Назаров бар.
Айта кетейік, бұған дейін де мәжіліс депутаттары “БАҚ туралы” заң жобасына ЛГБТ насихатына тыйым салатын түзету енгізуді ұсынған еді. Кейін олар бұл әрекеттерге қылмыстық жауапкершілік енгізуді де көтерген болатын. Алайда сәуір айында қабылданған заңның соңғы нұсқасына бұл түзетулер енбей қалған.
Мәдениет және ақпарат вице-министрі Қанат Ысқақовтың айтуынша, депутаттардың ұсыныстары заңның түпкі мәтінінде қарастырылмаған.