Алматы әкімі Дархан Сатыбалды «Қазақстан – Швейцария» парламенттік достық тобының тең төрағасы, кантондар кеңесінің депутаты Йозеф Дитли бастаған Швейцария Парламенті депутаттары делегациясымен кездесті.
Делегация құрамында кантондар кеңесінің бұрынғы төрағасы Филлип Ломбарди, кантондар кеңесінің депутаты Марко Кьеза, ұлттық кеңес депутаты Эрик Нусбаумер және Швейцария Конфедерациясы Парламентінің басқа да өкілдері болды.
Дархан Сатыбалды атап өткендей, Алматы – елдің ең ірі қаржы және іскерлік орталығы. Мұнда Қазақстандағы банк активтерінің 60 пайыздан астамы мен сақтандыру нарығының шамамен 70 пайызы шоғырланған. Қаланың экономикасының негізін қызмет көрсету мен сауда саласы құрайды, ал шағын және орта бизнес халықты жұмыспен қамтудың және табыс өсімінің негізгі көзі болып отыр.
Сондай-ақ әкімнің айтуынша, 2025 жылдың қаңтар–тамыз айларындағы қорытынды бойынша Алматы мен Швейцария арасындағы тауар айналымы 303 мың АҚШ доллар болды.
Кездесу барысында депутаттар табиғи жағдайы, іскерлік белсенділігі мен туризм және қаржы технологияларын дамыту әлеуеті тұрғысынан Алматының Лугано қаласына ұқсастығын атап өтті.
Кездесу қорытындысында тараптар Алматы мен Швейцария қалалары арасындағы ынтымақтастықты одан әрі нығайтуға, соның ішінде қалалық инфрақұрылым, орнықты даму және инновация салаларында тәжірибе алмасуға мүдделілік білдірді.
