Дархан Сатыбалды Алматы инвесторлары және кәсіпкерлерімен кездесу өткізді, – деп хабарлайды aqshamnews.kz тілшісі.
Алматы әкімі Дархан Сатыбалды инвесторлар және кәсіпкерлермен кездесу өткізіп, онда инвестициялық жобаларды іске асыру, әкімшілік кедергілерді жою және бизнес құқығын қорғауды күшейту жайын талқыланды. Іс-шараға қала прокуроры Серік Кәріпбеков, мемлекеттік органдардың, салалық бірлестіктер мен іскерлік қауымдастықтың өкілдері қатысты.
Кездесуді аша отырып, қала әкімі инвестициялық әлеуетті дамыту және қолайлы іскерлік орта қалыптастыру мемлекеттік саясаттың негізгі басымдықтарының бірі екенін атап өтті.
«Мемлекет басшысы инвесторларды сапалы сүйемелдеуді қамтамасыз ету, олардың құқығын қорғау және әкімшілік кедергілерді жою жөнінде нақты міндет қойды. Алматы әкімдігі бұл бағытта жүйелі жұмыс жүргізуде. Әкімдік, бизнес және прокуратура арасында үйлесімді әрі жедел іс-қимыл қажет», – деді Дархан Сатыбалды.
Әкімнің айтуынша, Алматы шетелдік инвестицияны тарту бойынша көшбасшы позициясын сақтап отыр. 2025 жылдың үш тоқсанының қорытындысы бойынша қалаға тартылған тікелей шетелдік инвестиция көлемі 6 млрд АҚШ долларына жетіп, бұл республикалық жалпы көрсеткіштің 42%-дан астамын қамтиды. Қалада шетелдік қатысуы бар 30 мыңнан астам заңды тұлға жұмыс істейді.
Дархан Сатыбалды әкімдік әрбір ірі инвестициялық жобаның іске асырылуын жүйелі түрде үйлестіріп, бақылауда ұстайтынын жеткізді. Орындау мерзіміне бақылау күшейтіліп, жеке жауапкершілік артады. Сонымен қатар инвесторларды сүйемелдеудің цифрлық құралдарын енгізу арқылы әкімшілік рәсімдер жеңілдетілуде.
Кездесу барысында инвесторлар мен кәсіпкерлер жобаларды іске асыру мерзімі, рұқсат құжаттарын алу, мемлекеттік органдармен өзара іс-қимыл және мемлекеттік қолдау шараларын қолдану мәселелері бойынша сұрақ қойды. Барлық өтініш салалық басқармалар мен прокуратураның қатысуымен қаралды.
Қала прокуроры Серік Кәріпбеков инвесторлардың құқығын қорғау прокуратура органдарының басым бағыты болып қала беретінін атап өтті.
«Біздің басты міндетіміз – инвестициялық жобаларды іске асыру кезінде заңдылықтың сақталуын қамтамасыз ету, кәсіпкерлік қызметке заңсыз араласуға жол бермеу және инвесторлардың өтінішіне жедел ден қою», – деді прокурор.
Кездесу барысында рәсімдердің ашықтығын арттыруға, инвесторларды сүйемелдеу тетіктерін жетілдіруге және мемлекеттік қызметтерді одан әрі цифрландыруға ерекше назар аударылды.
Іс-шара соңында ашық сұрақ-жауап сессиясы өтті. Оның аясында кәсіпкерлер қала басшылығымен және мемлекеттік органдар өкілдерімен өзекті мәселелерді тікелей талқылап, инвестициялық ахуалды жақсарту бойынша ұсыныс білдірді.
Кездесу қорытындысында мемлекет пен бизнес арасындағы тұрақты диалог сенімді нығайтуға, туындаған мәселелерді жедел шешуге және Алматының инвестициялық әлеуетін одан әрі дамытуға ықпал ететіні атап өтілді.