Алматы қаласының әкімі Дархан Сатыбалды жұмыс сапары кезінде мегаполистің мәдени инфрақұрылымын дамытуға байланысты негізгі жобалардың орындалу барысын тексеріп шықты, - деп хабарлайды Aqshamnews.kz.
Қала басшысы халық музыкалық шығармашылығын, қазақ рухани мәдениеті мен фольклорын сақтауға және дамытуға арналған еліміздегі жалғыз мәдени нысан – «Алатау» дәстүрлі өнер театрында болды. Қайта жөндеу аясында мұнда қасбетті жаңарту, тозған орындықтарды ауыстыру, өртке қарсы жабынды төсеу, сондай-ақ әртістердің өтініші бойынша сахнаны жаңғырту жоспарлануда.
Дархан Сатыбалды Alatau Сreative Hub кітапханасына ерекше назар аударды. Мәдени орын тұрғындардың кітап оқитын орталығы және Алатау ауданының мәдени алаңы мен коворкинг орталығының қызметтерін біріктіреді.
Бүгінде Alatau Creative Hub-та 25 тегін шығармашылық үйірме, мультимедиялық арт-студия және IT-зертхана жұмыс істейді. Жыл сайын кітапханаға 430 мыңнан астам адам келеді. Биылғы жылдың қыркүйек айынан бастап кітапхана тәулік бойы жұмыс кестесіне көшті. Ерекше қажеттіліктері бар келушілер үшін жұмыс орындары аудио сигналға және брайль дисплейіне арналған бағдарламалық-аппараттық құралдармен жабдықталған, радиожиілікті сәйкестендірудің RFID-жүйесі енгізілген.
Жұмыс сапарын қорытындылаған Дархан Сатыбалды Алматының мәдени орындары қала тұрғындарының күнделікті өмірінің ажырамас бөлігі ретінде дамуға тиіс екенін атап өтті.
«Біздің міндетіміз – тарихи ескерткіштерді сақтап қана қоймай, тұрғындар мен жастар үшін жаңа мәдени мүмкіндіктер ашатын заманауи сәулет ортасын құру», - деп атап өтті әкім.