Алматыдағы ATP 250 турнирі мәресіне жетті. Жекелей сында әлемнің 14-ракеткасы, ресейлік Даниил Медведев топ жарды, - деп хабарлайды аqshamnews.kz тілшісі.
Даниил Медведев рейтингіде 41-орында тұрған франциялық Корентен Мутемен кездесті.
Бірінші сет 7:5 есебімен ресейлік теннисшінің пайдасына шешілді. Екіншісінде франциялық спортшы есе қайырды - 6:4. Дегенмен шешуші сетте Медведев жеңісті жұлып алды - 6:3.
ATP жарыстарында 40-рет финалға шыққан Даниил 21-титулын жеңіп алды. Ол бұған дейінгі чемпиондық атағына 2023 жылғы мамырда қол жеткізген еді.
"Кейде ойыныма көңілім толмайды. Бірақ жеңістің орны бөлек. Бұл - матчтің ең маңызды кезеңінде жақсы ойнадым деген сөз. Әсіресе, шешуші гейм ерекше болды. Титулды жеңіп алғаныма қуаныштымын. Осымен 21 қалада 21 трофейге ие болдым", - деді Медведев ойыннан соң.
Жұптық сында франциялықтар Тео Аррибаж бен Альбано Оливетти үздік шықты. Олар финалда германиялық Якоб Шнайттер мен Марк Вальнерден айласын асырды - 6:4, 7:6 (10:8).
Аррибаж жұптық сында АТР додасындағы екінші, Оливетти үшінші титулын жеңіп алды.