Бұзақылық бойынша іс қозғалды.
Әлеуметтік желіде тарап кеткен видеода Астанадағы сауда-ойын сауық орталығында баласымен жүрген ер адамға жұдырық ала жүгірген бұзақы танымал боксшы Бейбіт Шүменов болып шықты, деп хабарлайды Almaty-akshamy.kz ІІМ-не сілтеме жасап.
ІІМ басшысының орынбасары Қайрат Сүнтаев балалы ер адамды соққыға жыққан боксшы Бейбіт Шүменов екенін растады.
"Иә, растаймыз. Қазір осы мәселемен айналысып жатырмыз. Бұзақылық бойынша іс қозғалды. Ол жерде қылмыс ауырлығы шамалы, сараптаманы күтіп отырмыз", - деді ол.
Ал осы істі қарап, қылмыс құрамын таппаған учаскелік инспекторға қатысты қызметтік тексеріс жүріп жатыр.
"Қызметтік тексеріс басталды, ол қатаң жазаланады. Күні кеше министр осы мәселені көтерді, ол жазаланады", - деп сендірді Сүнтаев.
Министрдің орынбасары төбелес кезінде бала зардап шекпегенін айтты.
"Бірақ жәбірленуші оны (боксшыны) қылмыстық жауапқа тартуды талап етіп отыр", - дейді Сүнтаев.
Айтуынша, оқиға кезінде Шүменов сау болған.
Astana TV арнасының ақпаратынша, ойын алаңында екі бала келіспей қалады. Содан екеуінің әкесі жанжалдасып, арты төбелеске ұласқан. Оқиға орнына келген полицейлер бұрынғы әлем чемпионы Бейбіт Шүменов пен қала тұрғыны Азизбек Қадыровтың төбелесіп қалғанын анықтаған. Бала ұстап тұрған ер адам жарақат алды, оны сот-медициналық сараптамаға жіберген.