Бұл қаражат 362 мың адамға шұғыл көмек көрсетуге арналады.
БҰҰ агенттіктері донорларды жер сілкінісінен зардап шеккен Ауғанстан халқына шұғыл көмек ретінде 110 миллион доллар бөлуге шақырды, деп хабарлайды Almaty-akshamy.kz Interfax.ru сілтеме жасап.
Сұралған сома келесі үш айда ең көп зардап шеккен Пактика және Хост провинцияларындағы 362 мың адамға шұғыл көмек көрсетуге арналған.
Ауғанстандағы жер сілкінісі салдарынан тұрғын үйлер, медициналық мекемелер мен мектептердің ғимараттары қирап қалғаны атап өтілді. Сондай-ақ, су және электр желілері зақымданған.
«Жаңа үндеу Ауғанстанға гуманитарлық көмек көрсету жоспарының басым бөлігі болып табылады, ол биылғы жылы 4,4 миллиард долларды босатуды көздейді. Өкінішке орай, жоспар тек 34% ғана қаржыландырылған», - делінген хабарламада.
Өткен жұмада БҰҰ-ның төтенше жағдайлар жөніндегі гуманитарлық үйлестірушісі Мартин Гриффитс Ауғанстанға төтенше жағдайларға жауап беру орталық қорынан 10 миллион доллар бөлу туралы шешім қабылдағанын хабарлады.
Хабарланғандай, 22 маусым күні жергілікті уақыт бойынша сағат 01:30-да Ауғанстанның оңтүстік-шығыс аймағында магнитудасы 5,9 болатын жер сілкінісі болды. 24 маусымда таңғы сағат 10:00-де Пактиканың Гиян ауданында дүмпу болып, кемінде бес адам қаза тауып, 11 адам жарақат алды.
БҰҰ мәліметі бойынша, осы уақытқа дейін 800-ге жуық адам қаза тауып, 1400-ден астамы жараланған, бірнеше мың үй қираған немесе бүлінген.