Маңғыстау облысында полиция екі сталкинг дерегі бойынша сотқа дейінгі тергеп-тексеру ісін жүргізіп жатыр. Екі жәбірленуші де бұрын таныс болған адамдардың қудалауына шағымданған, деп хабарлайды Aqshamnews.kz тілшісі Polisia.kz-ке сілтеме жасап.
Бірінші жағдай бойынша 1987 жылы туған әйел 13 қаңтарда «Е-өтініш» жүйесі арқылы полицияға жүгінген. Ол 2022 жылдың желтоқсанынан бері бір ер адаммен қарым-қатынаста болғанын, бірақ 2025 жылы байланысын үзгенін айтқан. Соған қарамастан, ер адам оны бақылап, ізіне түсуді тоқтатпаған.
Полиция мәліметінше, бұл жәбірленушінің алғашқы арызы емес. Күдікті 2025 жылдың сәуірінде ұсақ бұзақылық үшін айыппұл төлеген, ал мамырда отбасылық-тұрмыстық қатынастарға байланысты құқықбұзушылық үшін 15 тәулікке қамауға алынған. Бейнежазбалар қудалау фактілерін өткен жылдың шілдесіне дейін растайды. Аталған дерек бойынша іс тіркеліп, тергеу басталған.
Екінші дерек 3 ақпанда тіркелген. Маңғыстау тұрғынының айтуынша, бұрынғы танысы оны 2024 жылдың қазанынан бері мазалап келеді: әртүрлі нөмірлерден шамамен 300 рет қоңырау шалған, үйіне, жұмысына және Ақтаудағы демалыс орындарына дейін келіп, соңынан қалмаған.
Тергеу барысында күдіктіге қатысты қорғау нұсқамасы шығарылып, профилактикалық есепке қойылғаны анықталған. Алайда ол талапты сақтамай, әрекетін жалғастырған. Соның салдарынан қорғау нұсқамасын бұзғаны үшін әкімшілік хаттама толтырылып, азамат Ақтау қалалық полиция басқармасының уақытша ұстау изоляторына қамалған.