Қазақстан құрамасы Париждегі Паралимпиада ойындарын рекордтық нәтижемен аяқтады.
Ұлттық құрама әртүрлі дәрежедегі тоғыз медальға қол жеткізіп, қазақстандық параспортшылардың тарихындағы ең үздік нәтижені көрсетті, деп хабарлайды aqshamnews.kz
7 қыркүйекте Журкамырза Шукүрбеков (J2, 90 келіге дейінгі категория) және Зарина Райфова (J2, 70 келіге дейінгі категория) Қазақстанға екі қола медаль сыйлады.
Бұл Қазақстан үшін Парижде өткен XVII Жазғы Паралимпиада ойындарындағы ең сәтті көрсеткіш болды. Құрама 9 медаль иеленді: екі алтын, үш күміс және төрт қола.
Жалпы командалық медальдар кестесінде Қазақстан 39-орынға тұрақтады. Көш басында 216 медальмен Қытай, екінші орында 120 медальмен Ұлыбритания, үшінші орында 102 медальмен АҚШ тұр.
2020 жылы Токиода өткен Паралимпиадада қазақстандықтар 5 медаль (бір алтын, үш күміс және бір қола) жеңіп алған болатын.
Париждегі Паралимпиада ойындары 2024 жылдың 8 қыркүйегінде «Стад де Франс» стадионында жабылу салтанатымен аяқталады.