Қоштасуға қазақтың барлық игі жақсысы, барлық саланың өкілдері және Мұрат Мұхтарұлына тілеулес болған қарапайым тұрғындар да көп жиналды.
Бүгін Құрбан айтта қазақ елі асылдың сынығы, тұлпардың тұяғы, ұлтқа өмірінің соңына дейін адал қызмет еткен тұлға, көрнекті мемлекет және қоғам қайраткері, мәдениеттанушы, шығыстанушы ғалым, I дәрежелі "Барыс" орденінің иегері, дипломат Мұрат Мұхтарұлы Әуезовті соңғы сапарына шығарып салды, деп хабарлайды Almaty-akshamy.kz
Марқұммен қоштасу рәсімі Алматыдағы Мұхтар Әуезов атындағы Қазақ Ұлттық драма театрында өтті. Жаназасы да сол жерде шығарылды.
Қаралы жиында Мемлекет басшысы Қасым-Жомарт Кемелұлы Тоқаевтың көңіл айту хаты оқылды.
"Ұлт руханиятының алға басуына, қазақ ғылымының көкжиегін кеңейтуге бар саналы ғұмырын арнаған зиялы, парасатты тұлға еді. Қазақ әдебиеті мен мәдениетін, тарихын терең зерделеп, соңына өлшеусіз мол мұра қалдырды. Қазақстанның халықаралық дәрежедегі беделінің артуына өзінің саяси-қоғамдық істерімен зор үлес қосты. Ғибратты ғұмыр кешіп, кемел де кемеңгер әке жолын лайықты жалғаған Мұрат Мұхтарұлының жарқын бейнесі мен қадірлі есімі халқымыздың жүрегінде мәңгі сақталады. Марқұмның иманы саламат, жаны жәннатта болсын," – деп жазылған көңіл айту хатында.
Қоштасу рәсімінде, сондай-ақ ҚР Премьер-министрі Олжас Бектеновтің, Сенат спикері Мәулен Әшімбаевтің көңіл айту хаттары оқылды. Сөз сөйлегендердің ішінде белгілі мемлекет және қоғам қайраткері Мұхтар Құл-Мұхаммед, Қазақстан Жазушылар одағының төрағасы Мереке Құлкенов және т.б. зиялы қауым өкілдері болды. Мұхтар Әуезовтей кемеңгер әкенің жолын лайықты жалғай білген Мұрат Мұхтарұлының атына жақсы сөздер айтылды.
Марқұм Алматының орталығындағы Райымбек даңғылы бойындағы зиратта жатқан әкесі Мұхтар Әуезовтің қасына жерленді.