Атырауда жергілікті блогерді бопсалау мен ұрлық жасағаны үшін соттады.
Ол супермаркетте мерзімі өткен тауарларды байқап, дүкен қызметкеріне полиция шақырамын деп екі миллион теңге талап етіп қорқытқан, деп хабарлайды aqshamnews.kz.
Содан полиция шақыртқан. Полиция келгеннен кейін блогер мерзімі өткен өнімдер сатылғаны және тауарларда мемлекеттік тілде ақпараттың болмауы туралы арыз жазған. Артынан дүкендегілерге өзінің арызын қайтарып алатынын айтып, 39 824 теңге тұратын өнімдерді алып кеткен.
Бірнеше күннен кейін блогер Атырау қаласының №2 сотына барып, сот процесіне қатысушы әріптесін қолдауға келген. Осы кезде ол прокурорлар бөлмесіне кіріп, прокурорлардың бірінің қалтасынан 20 мың теңге ұрлап кеткен.
Дегенмен, айыпталушы кінәсін мойындамай, өзін ақтауды сұраған.
Сот блогерді ҚР ҚК 194-бабының 2-бөлігінің 3-тармағы мен 188-бабының 3-бөлігінің 3-тармағы бойынша кінәлі деп тапты. ҚР ҚК 58-бабына сәйкес оған 3 жыл 1 ай мерзімге бас бостандығынан айыру жазасы тағайындалды.
Сот үкімі әлі заңды күшіне енген жоқ.