2024 жылы Қазақстанның су қоймалары рекордтық 75 миллиард текше метр су жинады. Оның ішінде 12 миллиард текше метр су тасқыны кезінде келген су, деп хабарлайды aqshamnews.kz ҚР Су ресурстары министрлігіне сілтеме жасап
Балқаш көліне биыл 15,4 миллиард текше метр су келіп түсті — бұл өткен жылмен салыстырғанда 4 миллиардқа көп. Оның шамамен бестен бірі су тасқыны кезінде жиналған. Сонымен қатар, соңғы 10 жылда алғаш рет Қапшағай су қоймасы толық көлемде толтырылды.
Каспий теңізіне жыл басынан бері 17 миллиард текше метр су құйылса, Солтүстік Арал теңізіне 2,5 миллиард текше метр су жетті. Бұл өткен жылмен салыстырғанда 400 миллион текше метрге артық.
«Биыл су қоймаларын толықтыру барысында аграрийлер мен басқа да су пайдаланушылардың мүдделері ескерілді. Мәселен, шаруа қожалықтары суару кезеңінде шамамен 11 миллиард текше метр су алды», — деп түсіндірді Су ресурстары министрі Нұржан Нұржігітов.
Қызылорда облысында су үнемдеу технологияларын енгізу нәтижесінде 200 миллион текше метр су үнемделіп, ол Солтүстік Аралға бағытталды. Жалпы, аймақтағы көлдер жүйесіне 4,7 миллиард текше метр су келді, бұл 2023 жылмен салыстырғанда сәл артық.
Ұлытау облысынан Қызылорда өңіріне 839 миллион текше метр су жіберілді. Алғаш рет Сарысу өзені арқылы өткен бұл су көлемі жергілікті көлдер жүйесіне жетті.
Бұл жетістіктер су ресурстарын тиімді басқарудың және жаңа технологияларды пайдаланудың айқын мысалына айналды.