ҚР Ғылым және жоғары білім министрлігі Жоғары және жоғары оқу орнынан кейінгі білім комитеті төрағасының орынбасары Жанна Есімбаева мемлекеттік білім беру тапсырысы еңбек нарығының білікті мамандарға деген сұранысын ескере отырып қалыптастырылатынын атап өтті, – деп хабарлайды aqshamnews.kz тілшісі.
"Биыл гранттардың 60%-ы инженерлік-техникалық бағыттағы мамандарды даярлауға, 20%-ы педагогикалық бағыттарға, қалған 20%-ы өзге де білім беру бағыттарына бөлінді", – деді Жанна Есімбаева.
Оның айтуынша, 2026–2027 оқу жылына бакалавриат бағдарламалары бойынша 75 мыңға жуық білім беру гранты қарастырылған.
"Конкурсқа қатысу үшін 127 мыңға жуық өтініш берілді. Гранттар ҰБТ нәтижелері, талапкерлер таңдаған білім беру бағдарламалары мен жоғары оқу орындары, сондай-ақ заңнамада белгіленген квоталар ескеріле отырып, конкурстық негізде бөлінді", – деп атап өтті Жанна Есімбаева.