29 маусым күні Алматы қаласы өңірлік коммуникациялар қызметінің алаңында «Халықтың бюджетке қатысуы» жобасына қала тұрғындарының қатысу мәселелері туралы баспасөз конференциясы өтті, деп хабарлайды Аlmaty-akshamy.kz.
Іс-шараның спикерлері – Алматы қаласы қаржы басқармасы басшысының міндетін атқарушы Алтынай Төлеутаева және «Алматы қаласын дамыту орталығы» АҚ басқарушы директоры Аида Мұстафинова.
2019 жылы Алматы әкімдігі Қазақстанда алғаш рет «Халықтың бюджетке қатысуы» пилоттық жобасын іске асыруды бастады, оның мақсаты тұрғындардың бастамалары мен ұсыныстары негізінде қала аудандарын дамыту және абаттандыру.
2019 жылы Алматы тұрғындарынан 333, ал 2020 жылы 795 бастама түсті. Өткен жылы қала тұрғындары өз аулаларын, көшелерін және аудандарын дамытуға және абаттандыруға 934 ұсыныс берді.
Өткен жылдың қорытындысы бойынша, қала тұрғындарының бастамасына қатысты Алматыда жалпы құны 5,4 млрд теңге болатын 256 жоба іске асырылып, пайдалануға берілді. Іске асырылған жобалардың ішінде Алатау ауданының "Шаңырақ-2" шағынауданындағы (Ысқақов көшесі) және "Томирис" шағынауданындағы (Марқатау көшесі) балалар және спорт алаңдарын ағымдағы жөндеу; Түрксіб ауданының Волочаевская және Сүйінбай көшелеріндегі балалар және спорт алаңдарын; Әуезов ауданының Саин және Жұбанов көшелері қиылысындағы көпір астындағы спорт алаңдарын, Төле би көшесінің, (Яссауи көшесі мен Момышұлы көшесінің арасындағы) Яссауи көшесінің бойындағы жаяу жүргіншілер аймағын салу және т.б.
Ағымдағы жылдың 1 маусымынан бастап Алматыда «Халықтың бюджетке қатысуы» аясында жобалық ұсыныстарды қабылдау басталды, оларды іске асыру 2023 жылға жоспарлануда. Өтінім беру мерзімі budget.open-almaty.kz. сайты арқылы 20 шілдеге дейін әрі бір жобаның ең жоғары құны 61,2 млн теңгеден аспайды.
Бүгінде қала тұрғындары 62 өтінім берді. Берілген бастамалар саны бойынша Алатау (20), Бостандық (10), Әуезов (7) және Медеу (7) аудандары көш бастап тұр.