Жөндеу қауіпсіздік үшін қажет
Жыл соңына дейін ірілі-ұсақты 1 054 шақырым темір жол жамап-жасқалады. Соның ішінде 550 шақырым жолға күрделі жөндеу жүргізіледі, деп хабарлайды Almaty-akshamy.kz Egemen.kz-ке сілтеме жасап.
Жұмыс барысында ескі жол алынып, оның орнына жаңа рельс-шпалдар төселеді. Бұл үшін арнайы жол техникалары – бөлшектеу және салу крандары, түзету-қағу-тегістеу, жолды біркелкі ету машиналары, әмбебап құрал-саймандармен жабдықталған платформалар пайдаланылады.
Биылдыққа негізінен Түркістан, Павлодар, Қарағанды, Қостанай, Қызылорда, Атырау, Маңғыстау бөлімшелерінің магистралдық желілерін бүтіндеп шығу көзделіп отыр. Бұған дейін Түркістан облысындағы жұмыстың қалай жүріп жатқаны және Шымкент магистралдық желі бөлімшесіне қарасты Шағыр – Талдықұдық аралығындағы шойын жолдың қалай жөнделіп жатқаны туралы жан-жақты ақпарат берілген-ді.
Жалпы, «Қазақстан темір жолы» ҰК» АҚ темір жол магистралдарын жоспарлы түрде жыл сайын жөндеуден өткізіп тұрады. Бұл қарекет ең әуелі қауіпсіздікті сақтау үшін қажет.