Қазақтың бұлбұлы, КСРО және Қазақстанның халық әртісі, сүйікті опера өнерінің саңлағы Бибігүл Төлегенова барша қазақстандықтарды Тәуелсіздік мерекесімен шын жүректен құттықтады. Атақты әнші халқына ақ тілегін арнап, елімізге бейбіт өмір мен жарқын болашақ тіледі.
– "Еліміз аман, жұртымыз тыныш болғай! Мемлекетіміздің Тәуелсіздік күнімен құттықтай отырып, баршаңызға зор денсаулық, ұзақ өмір тілеймін! Жауған аппақ қардай көңіл тілеймін. Іштегі, сырттағы жаудан сақтасын. Келесі мерекелерді аман-есен қарсы алу бұйырсын. Келе жатқан Жаңа жыл да құтты болсын!" – деп жүрекжарды тілегін жеткізді халық әртісі.
Бүгінгі айтулы мереке қазақ халқы үшін ерекше күн екені сөзсіз. Сонымен бірге, бұл күн Бибігүл Ахметқызының 95 жасқа толуымен де ерекше үйлесіп отыр. Сүйікті өнер қайраткерінің ғұмыр жасы ұзақ болсын, халқымыздың мәдени мұрасының жарқын бейнесі болып қала берері анық!