Мұның шешімі — Nomad Guard, – деп хабарлайды aqshamnews.kz тілшісі.
Бұл арнайы қосымша емес, eGov mobile ішіндегі қызметтің бір түрі.
Qazaqstan.tv тілшісінің хабарлауынша, мәселе деректеріміздің ретсіз ұрлануынан туындайды екен. Енді осы қызметтің көмегімен сіз бен біз жеке деректерімізді кім таратқанын тексере аламыз.
Nomad Guard сервисі деректер жинақталған барлық жүйені сүзгіден өткізе алады дейді әріптестер. Яғни, қандай да бір мемлекеттік қызметті аларда, банкте немесе әлдебір сайтқа мәлімет енгізсек — соның бәрі осы жүйеде көрінеді. Деректерді кім, қай уақытта алғанын анықтауға болады.
Ол үшін не істеу керек?
◾ eGov mobile қолданамыз
◾ «Қызметтер» батырмасын таңдаймыз
◾ Nomad Guard бөліміне өтеміз
◾ «Тексеру» түймесін басамыз.
Қызметтің қандай нәтиже бергенін «Менің тексерістерім» бөлімінен біле аламыз. Әрі қарай тілші былай баяндайды:
Деректерді кім пайдаланғанын білдік. Әрі қарай не істейміз? Егер тізімде сіз жүгінген сайт, не мекеме болса, алаңдамаңыз.
Мысалы, сайт арқылы киноға билет алдыңыз делік. Деректеріңізді сол күні бір рет қана қолданған. Демек, күдікті олар емес. Ал тізімде сіз ешқашан қолданбаған қызмет түрі болса, Цифрлық даму министрлігіне хабарлау қажет.
Ол үшін қайтадан, eGov қосымшасына кіріп, е-Өтінім батырмасын таңдау керек. Бұдан соң тиісті ведомствоны таңдайсыз да, «Сипаттама» бөліміне жағдайды баяндайсыз. Ал файлдар бөліміне Nomad Guard қосымшасынан алған тізімді бекітесіз. Оны жеке деректеріңіз тарағаны туралы дәлел ретінде ұсына аласыз.
Міне, осы қадамдарды жасағаннан кейін белгісіз нөмірлерден келетін қоңыраулар тыйылады, дейді жауаптылар.