4 маусым - тыныштық күні екенін ескертті.
Маусымның 4 күні сағат 00:00-де референдум алдындағы үгіт жүргізу аяқталады. Бас прокуратура өкілі Болат Дембаев «тыныштық күні» тәртіп бұзғандардың жауапкершілікке тартылатынын ескертеді, деп хабарлайды Almaty-akshamy.kz.
«Ертең, 4 маусымда сағат 00:00-де референдум алдындағы үгіт жүргізу аяқталады...Бұл үгітке, соның ішінде қоғамдық пікірге сұрау салу нәтижелерін немесе референдум нәтижелерінің болжамдарын жариялаумен ұштасқанға референдум өткізілетін күннің алдындағы күні және ол өткізілетін күні, яғни ағымдағы жылдың 4 және 5 маусымында тыйым салынады (Конституциялық заңның 7-бабының 4-тармағы). Осы күндері – үгітке тыйым салынған кезеңде ол жүргізілген жағдайда Қазақстан Республикасының Әкімшілік құқық бұзушылық туралы кодексінің 102-бабы бойынша жауаптылық туындайды», - делінген мәлімдемеде.
Оның айтуынша, яғни үгіт-насихатқа тыйым салынған кезеңде бұл іс-шаралар жүргізілген жағдайда ҚР Әкімшілік құқық бұзушылық туралы кодексінің (ӘҚБтК) 102-бабы бойынша жауапкершілік ескерілген.
«Екі немесе одан да көп рет немесе басқа біреу үшін дауыс беру, сондай-ақ учаскелік референдум комиссиясы мүшесінің азаматтарға өзге адамдар үшін дауыс беруге мүмкіндік жасау мақсатында бюллетеньдерді беру әрекеті ӘҚБтК-нің 108 және 110-баптары бойынша жауаптылыққа әкеп соғатынына да назар аударамыз», - дейді Бас прокурордың орынбасары.
Оның сөзіне қарағанда, Конституцияға (83-бап) сәйкес, прокуратура органдары референдумға дайындық пен оны өткізудің барлық сатыларында заңдылықтың сақталуына жоғары қадағалауды қамтамасыз етіп отыр. Аталған мәселелерді ескере отырып, Бас прокуратура заңдылықты қамтамасыз ету және құқық бұзушылықтардың алдын алу мақсатында азаматтарды, қоғамдық бірлестіктер мен бұқаралық ақпарат құралдарын қолданыстағы заңнаманы қатаң сақтауға шақырды.