Атырау облысы: су тасқынынан кейін қалпына келтіру
Үкімет отырысында Атырау облысының әкімі Серік Шапкенов су тасқынынан зардап шеккен 2674 үйді қалпына келтіру жұмыстары туралы баяндады. Барлық зардап шеккендерге өтемақы төленді.
Баспанаға мұқтаж жандар Жылыой ауданының Құлсары қаласындағы «Болашақ» шағын ауданындағы 100 жаңа типтік тұрғын үйдің кілтін алады.
Газ және электр желілеріндегі зақымданулар толығымен қалпына келтірілді, жыл соңына дейін көлік учаскелерін, көпірлер мен бірқатар білім беру объектілерін ағымдағы жөндеу жұмысы аяқталады.
Суға кеткен мал үшін иелеріне өтемақы ретінде 274 млн теңге төленді. Арнайы комиссия зардап шеккен 337 кәсіпкердің өтініштерін қарады, оның ішінде 301 кәсіпкер 4,1 млрд теңге төлем алды.