Медеу ауданындағы №115 бөбекжай-балабақшасында «AMANAT» партиясының «Бақытты отбасы» жобасы аясында «Толағай» атты отбасылық спорттық жарыс өтті.
Іс-шараның басты мақсаты – отбасы құндылықтарын дәріптеу және салауатты өмір салтын мектепке дейінгі жастағы балалардың бойына сіңіру. Жарысқа №110, №114, №115 және №125 бөбекжай-балабақшаларының тәрбиеленушілері мен олардың ата-аналары белсене қатысты. Шара барысында қатысушылар түрлі спорттық эстафеталар мен ойындар арқылы ұйымшылдықты, белсенділікті және отбасы мүшелері арасындағы өзара бірлікті көрсетті.
Іс-шараға Алматы қалалық филиалы төрағасының орынбасары Қуаныш Төлепов, қалалық мәслихат депутаты Елена Те, Олимпиада чемпионы, партия мүшесі Ермахан Ибраимов және басқа да қоғам белсенділері арнайы қатысты.
№115 бөбекжай-балабақшасының меңгерушісі Альфия Естенова өз сөзінде шетелдік тағылымдамалардан көрген озық тәжірибені балабақша тәрбие үрдісіне енгізудің маңызын атап өтті:
– Бұл шара – шетелдік тағылымдамалар барысында жинақталған озық тәжірибені мектепке дейінгі тәрбие мен оқыту процесіне енгізудің алғашқы қадамдарының бірі. Малайзия, Қытай, Польша және Германия мемлекеттерінде көрген тиімді тәсілдер – балалардың күнделікті өмірін белсенді әрі саналы етудің жолы. Әсіресе, ұлттық спорт түрлері, өзін-өзі күту дағдылары, ашық алаңдағы ойындар, өзін-өзі күту дағдылары мен психологиялық қолдау бағыттары біздің жүйеге де оң ықпал ететініне сенімдімін. Мектепке дейінгі жас, ол – денсаулықтың, жеке тұлға болып қалыптасудың негізі қаланатын маңызды кезең, – деді.
Жарыс нәтижесі бойынша орындар келесідей бөлінді: 1 орын – №110 бөбекжай-балабақшасы; 2 орын – №114 бөбекжай-балабақшасы; 3 орын – №115 бөбекжай-балабақшасы; 4 орын – №125 бөбекжай-балабақшасы.
Отбасы – қоғамның өзегі. Мұндай іс-шаралар жас ұрпаққа дұрыс бағыт-бағдар беріп қана қоймай, оларды физикалық және рухани тұрғыда шыңдауға ықпал етеді. Бұл ел болашағына салынған берік іргетас.