Назым Қызайбай - еліміздегі әйелдер боксының басты қаһармандарының бірі. Назым Қызайбай 4 жылда бір келетін олимпиада ойындарына алғаш рет қатысуда
Бүгінге дейін әлем чемпионатын екі рет ұтқан боксшы қызымыздың Олимпиадаға жолы енді ашылды, деп хабарлайды aqshamnews.kz.
Назымның есімі әуесқой бокс әлемінде ерте танылды. Ол әлем біріншіліктеріндегі ең алғашқы жүлдесін 2012 жылы иеленген. Қытайдың Циньхуандао қаласында өткен әлем чемпионатында Қызайбай қола жүлдегер атанды.
Араға екі жыл салып Назымға әлем чемпионатының алтыны бұйырды. 2014 жылы Оңтүстік Кореяның Чеджу қаласында ол 48 келі салмақта әлем чемпионы атанды. Бұл бокстан қазақ қыздары еншілеген әлемдік сынның алғашқы алтыны болатын.
Жалпы, Назым Қызайбай үлкен спорттағы жетістіктерінің басым бөлігіне ең жеңіл салмақта қол жеткізді. 2016 жылы Астанада ұйымдастырылған әлем біріншілігінде ол өз атағын сәтті қорғап, екі дүркін әлем чемпионы атанды. Әзірге, Назымнан басқа боксшы қыздарымыз мұндай жетістікпен мақтана алмайды.
Естеріңізге сала кетейік, бүгін намысты қыз - Назым Қызайбай жартылай финалда 2023 жылғы әлем чемпионы, АО-2023 чемпионы, қытайлық Ву Юмен (52 кг) кездеседі.