Қазақстанда барлық банктерді қолма-қол емес төлемдерге арналған бірыңғай QR-код жүйесіне қатысуға міндеттеуі мүмкін.
Жүйенің бірыңғай операторы – Ұлттық банкке 100% тиесілі ұлттық төлем корпорациясы болады. Қазіргі уақытта еліміздегі барлық қолма-қол емес төлемдердің 90%-ы немесе күн сайын шамамен 5,9 трлн теңге осы корпорация арқылы өтеді. Қаржы реттеушісінің төрағасы Тимур Сүлейменовтің айтуынша, бірыңғай QR-код жүйесінде толыққанды жұмыс істеп жатқан 3 банк бар, тағы 9 банк сынақ режимінде.
– Жыл соңына дейін банктермен серіктестік қарым-қатынас арқылы немесе заңнамаға енгізілетін түзетулер негізінде барлық банкті жүйеге қосу міндеті тұр. Біз бұл бағытта екі жолмен қатар қозғаламыз. Банктер бұл процесті түсініп отыр. Мұнда мәселе – бұл үлкен технологиялық жоба. Әр банктің өзінің жүйесі бар, әрқайсысы жеке экожүйесін дамытуға тырысады. Енді олардың барлығын бірыңғай орталыққа, бірыңғай операторға қосу қажет. Бұл – қосымша шығын, адами және технологиялық ресурстар талап етеді, – деді Ұлттық банк басшысы.
Қазақстанда бірыңғай QR-код жүйесінің пилоттық жобасы 2024 жылдың қарашасында іске қосылған.