Балаларды қорғау және оларды үйлесімді дамыту әкімдіктің ерекше назарында.
Мемлекет басшысының шешімімен биыл Балалар жылы болып жарияланды. Бұл туралы қала әкімі Ерболат Досаев Бостандық ауданының тұрғындарымен өткен кездесуде айтты, деп хабарлайды Almaty-akshamy.kz
Қала әкімі жыл бойы қалада жеке жоспар бойынша балаларға арналған іс-шаралар, қайырымдылық акциялары мен фестивальдар өткізілетіні айтты. Балаларға мектепке дейінгі білім беру, яғни балабақшалар санын көбейтіп қана қоймай, олардың сапасы мен инклюзивтілігін арттыру мәселелері де ерекше назарда болады.
«Мектептер, олардағы орын тапшылығы туралы мен жоғарыда айтып өттім. Тек Президенттің тапсырмасы бойынша балалардың спорт және шығармашылық үйірмелерге тегін қатысуын жан басына қаржыландыру бағдарламасы іске асырылып жатқанын атап өткім келеді. Биыл спорт секцияларына қатысуға 3,2 млрд теңге, ал шығармашылық үйірмелерге 4 млрд теңге бөлінді», - деді Ерболат Досаев.
Спорт секцияларына қатысатын 44 мың баланың 6,8 мыңы Бостандық ауданында тұрады. Олар 81 спорт секциясына қатысады.
Сондай-ақ, қала бойынша шығармашылық үйірмелерге 54 мың бала қатысады. Бостандық ауданынан 9 мың бала 115 шығармашылық үйірмеге барады.
Шаһар басшысы кездесуде бұл бағдарламаның халықтың нақты қажеттіліктеріне қарай одан әрі іске асырылатынын айтты.